ޤައުމީ ޕޭމަންޓް ސިސްޓަމް ޤާނޫނަށް ސަރުކާރުގެ ފަރާތުން ހުށަހެޅި އިސްލާހުތައް މާލިއްޔަތު ކޮމިޓީން މިއަދު ފާސްކޮށްފިއެވެ.
ސަރުކާރުގެ ފަރާތުން ބިލް ހުށަހަޅުއްވާފައިވަނީ، ޕީއެންސީއަށް ނިސްބަތްވެ ވަޑައިގަންނަވާ މަކުނުދޫ ދާއިރާގެ މެންބަރު އާދަމް ޝަފީޤެވެ.
ޤައުމީ ޕޭމަންޓް ސިސްޓަމް ބިލަށް ފިނޭންސް މިނިސްޓްރީ އާއި، މަރުކަޒީ ބޭންކްގެ އިތުރުން ހުރިހާ ބޭންކްތަކަށާއި ވެސްޓަން ޔޫނިއަންގެ އިތުރުން އިކޮނޮމިކް މިނިސްޓްރީ އާއި ސީއެމްޑީއޭ ފަދަ ތަންތަނަށް ވަނީ ހިޔާލުދިނުމަށް އެދި ފޮނުވާފައެވެ. އެކަމަށް އެދި ފޮނުވުމުން ހިޔާލު ފޮނުވާފައިވަނީ، ފިނޭންސް މިނިސްޓްރީއާއި، މަރުކަޒީ ބޭންކާ ސީއެމްޑީއޭގެ އިތުރުން އިކޮނޮމިކް މިނިސްޓްރީ އާއި އިސްލާމިކް ބޭންކުންނެވެ. އަދި ޕަބްލިކަށް ހުޅުވާލުމުން ހިޔާލު ހުށަހަޅާފައިވަނީ ދިރާގްފިންޓެޗުންނެވެ.
ޤައުމީ ޕޭމަންޓް ސިސްޓަމް ޤާނޫނަށް ހުށެހެޅި އިސްލާހްގައި ބުނެފައިވަނީ، ޕޭމަންޓް ހިދުމަތެއް ދިނުމަށްޓަކައި މަރުކަޒީ ބޭންކަށް ހިއްސާދާރެއްގެ ނުވަތަ ޕާޓްނަރެއްގެ ހައިސިއްޔަތުން ކުންފުންޏެއް/ ޕާޓްނަރޝިޕެއް ނުވަތަ ޖޮއިންޓް ވެންޗާއެއް ހެއްދިދާނެ ކަމަށެވެ. މީގެ އިތުރުން ގެނެވުނު އސްލާހްގައި ބުނެފައިވަނީ މަރުކަޒީ ބޭންކުން އިސްތިސްނާކޮށްފައިވާ ފަރާތްތަކާއި އެފަދަ ފަރާތްތައް ފިޔަވައި އެހެން އެއްވެސް ފަރާތަކުން ހުއްދަ ލިބިގެން މެނުވީ ރާއްޖޭގައި ޕޭމަންޓް ހިދުމަތެއް ދީގެން ނުވާނޭކަމަށެވެ.
އަދި އެފަދަ ކަމެއް ކޮށްފިނަމަ އެއްލައްކަ ރުފިޔާ އާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭގޮތަށް މަރުކަޒީ ބޭންކަށް ވަނީ ބާރުދީފައެވެ.
ޤައުމީ ޕޭމަންޓް ސިސްޓަމް ޤާނޫނަށް ހުށަހެޅި މި އިސްލާހްތަކާ ދެކޮޅަށް ވާހަކަދެއްކެވީ، އެމްޑީޕީއަށް ނިސްބަތްވެ ވަޑައިގަންނަވާ ހދ ހަނިމާދޫ ދާއިރާގެ މެމްބަރު ޢަބްދުލްޢަފޫރު މޫސާ (ގަޕޯ) އެވެ. އޭނާ ވިދާޅުވީ މޯލްޑިވްސް މަނިޓަރީ އޮތޯރިޓީއަކީ ރާއްޖޭގެ މާލީ ނިޒާމް ރެގިއުލޭޓްކޮށް ބެލެހެއްޓުމަށް ޤާނޫނީގޮތުން ބަލަދުވެރިކަން ލިބިގެންވާ އޮތޯރިޓީކަމަށެވެ. އެހެންކަމުން އެމްއެމްއޭއިން ޕޭމަންޓް ސިސްޓަމްތަކުގެ ތެރެއަށް ކުންފުނިތައް ހަދައިގެން ވަދެ ކަންކަންކުރީމާ އުސޫލްތަކާ ފުށުއަރާކަން ގަޕޯ ވަނީ ފާހަގަކުރައްވާފައެވެ.
ގަޕޯގެ ވާހަކައަށް ރައްދުދެއްވަމުން ކޮމިޓީގައި ބައިވެރެވަޑައިގެންނެވި މެމްބަރުން ވަނީ ސެންޓްރަލް ބޭންކަކީ ކްލިއަރެންސް ހައުސްކަމުން އެ ބޭންކުގެ ބައިވެރިވުމެއްނެތި މިފަދަ ޕޭވްމަންޓް ނިޒާމެއް ނުހިންގޭނޭކަން ފާހަގަކުރައްވާފައެވެ. އެގޮތުން މިފަދަ ކަމެއްގައި ކްލިއަރަންސް ބޭންކެއްގެ ގޮތުގައި އިތުބާރުހުރި ބޭންކެއް ބައިވެރިވާން ޖެހޭނޭކަން މެމްބަރުން ވަނީ ފާހަގަކުރައްވާފައެވެ.
ބިލް ދިރާސާކުރި މާލިއްޔަތު ކޮމިޓީން ބިލް ފާސްކޮށްފައިވަނީ، ކޮމިޓީއަށް ވަޑައިގެންނެވި މެމްބަރުންގެ ތެރެއިން 7 މެމްބަރެއްގެ ތާއީދާއެކުއެވެ.
ޤައުމީ ޕޭމަންޓް ސިސްޓަމް ވަކި ކުންފުންޏެއްގެ ދަށުން ހިންގުމަށް ނިންމާފައިވާކަން މަރުކަޒީ ބޭންކުން އިއުލާނުކޮށްފައިވަނީ ހުސްވި ޖުލައިމަހުގެ 26 ވަނަ ދުވަހެވެ. އެމްއެމްއޭއިން ޤައުމީ ޕޭމަންޓް ސިސްޓަމް ހިންގުމަށް ނިންމާފައިވަނީ "ޕޭމަންޓް މޯލްޑިވްސް" ނަމުގައި ކުންފުންޏެއް ހަދައިގެންނެވެ. މީގެ އެއް ބޭނުމަކީ ބައިނަލްއަޤްވާމީ ފެންވަރުގައި ބަލައިގަންނާނޭ ޕޭމަންޓް ނުވަތަ ފައިސާގެ މުއާމަލާތުގެ ނިޒާމެއް ގާއިމްކުރުންކަމަށް އެ ބޭންކުން ބުނެއެވެ.
Advertisement
This content is created and paid for by advertisers and does not involve Voice Journalists
