ކަރަންޓް އައުމާއެކު، މަޖިލީހުގެ ޖަލްސާ ފަށައިފި
ކަރަންޓް ކަނޑައިގެން ދިއުމުގެ ސަބަބުން މެދުކަނދާލި ރައްޔިތުން މަޖިލީހުގެ ޖަލްސާ އަލުން ފަށައިފިއެވެ.
މިއަދު 9 ޖެހިއިރު މަޖިލީހުގެ ޖަލްސާ ފަށައިގެން ކުރިއަށް ގެންދެވުނީ 24 ހަކަށް މިނެޓެވެ. ޖަލްސާ ފެށުމާއެކު ފުރަތަމަ ކަމަކަށް އޮތީ، ސިވިލް ސާވިސް ކޮމިޝަނަށް މެމްބަރުން އައްޔަންކުރުމަށް ރައީސުލްޖުމްހޫރިއްޔާ ފޮނުއްވި ނަންފުޅުތައް ދިރާސާ ކުރުމަށްފަހު ކޮމިޓީއަށް ފޮނުވުމެވެ.
އެއަށްފަހު ދެން ކުރިއަށްދިޔައީ މިއަދަށް އެޖެންޑާ ކޮށްފައި އޮތް އިންޝުއުރަންސް ބިލަށް މާލިއްޔަތު ކޮމިޓީން ނިންމެވިގޮތަށް ބަހުސް ކުރުމެވެ. ކަރަންޓް ކަނޑައިގެން ދިޔައީ ހުރާ ދާއިރާގެ ޕީއެންސީ މެންބަރު އަނާރާ ނައީމް ވާހަކަފުޅު ދައްކަވަނިކޮށެވެ.
ކަރަންޓް ދިއުމުން ރިޔާސަތުން ވަނި ޖަލްސާ މެދުކަނޑާލާފައެވެ. ޖަލްސާ މެދުކަނޑާލީ މައްސަލަ ހައްލުވޭތޯ ބަލުމަށް ފަހުއެވެ. މަޖިލީހުގެ ތަޅުމުން ކަރަންޓް ކަނޑައިގެން ދިޔަ ސަބަބެއް މަޖިލީހުގެ އިދާރާއަކުން ބުނެފައެއް ނުވެއެވެ.
ޤާނޫނު ހަދާ މަޖިލީހުގެ ތެރެއިން ކަރަންޓް ކަނޑައިގެން ގޮސްފައިވާއިރު، މި ފަހަކަށް އައިސް މާލެ ސަރަހައްދުން ކަރަންޓް ކެނޑޭ މިންވަރު ވަނީ އިތުރުވެފައެވެ.
Advertisement
This content is created and paid for by advertisers and does not involve Voice Journalists
