އެމެރިކާ ނުރުހުނަސް އިންޑިއާއަށް ތެޔޮ ވިއްކާނަން: ރަޝިޔާ
އެމެރިކާ ނުރުހުނަސް ކުރިއަށް އޮތްތަނުގައިވެސް އިންޑިއާއަށް ތެޔޮ ވިއްކަމުންދާނެކަމަށް ރަޝިޔާއިން ބުނެފިއެވެ.
އިންޑިއާއަށް ބޭނުންވާ ތެޔޮ ރަޝިޔާއިން ގަންނަ މައްސަލައިގައި އެމެރިކާއިން ހިތްހަމަނުޖެހި، އިންޑިއާއިން އެމެރިކާއަށް އެތެރެކުރާ މުދަލުން 25 އިންސައްތައިގެ ޓެރިފެއް އަންނަ ހަފްތާއިން ފެށިގެން ނަގަން ފަށާނެއެވެ. އިންޑިއާގައި މިވަގުތު ހުންނެވި ރަޝިޔާގެ އެންމެ އިސް ޑިޕްލޮމެޓް ރޮމަން ބަބުޝްކިން ވިދާޅުވީ މަސްރަހު ގޯސްވިޔަސް، އިންޑިއާއިން ތެޔޮ ގަންނާނެކަމަށް އުއްމީދުކުރާކަމަށާއި، ތެޔޮ ސަޕްލައިކުރުން ރަޝިޔާއިން ހުއްޓާ ނުލާނެކަމަށެވެ.
ޔޫކްރެއިން ހަނގުރާމަ ފެށުމުގެ ކުރިން އިންޑިއާއަށް އެތެރެކުރާ ތެލުން ރަޝިޔާ ހިއްސާކުރަނީ ވަރަށް ކުޑަކުޑަ މިންވަރެކެވެ. އެހެންނަމަވެސް، ދުނިޔޭގެ ތެލުގެ ބާޒާރަށް އައި ލޮޅުންތަކާއެކު، ހެޔޮ އަގުގައި ތެޔޮ ހޯދުމަށް ދަތިތައް ދިމާވެ، އިންޑިއާއިން ރަޝިޔާގެ ތެޔޮ ގަތުން އިތުރުކުރިއެވެ. އިންޑިއާއަށް ބޭރުން އެތެރެކުރާ ތެލުގެ 25 އިންސައްތައަކީ މިހާރު ރަޝިޔާއިން ގެންނަ ތެލެވެ.
ދާދިފަހުން ރަޝިޔާގެ ފަރސްޓް ޑެޕިއުޓީ ޕްރައިމް މިނިސްޓަރ ޑެނިސް މަންތުރޯވް ވިދާޅުވީ ސާފުނުކުރާ ތެލާއި، ބޯޓު ދެލި މިހާރުވެސް އިންޑިއާއަށް ބޭރުކުރާ ފަދައިން، ރަޝިޔާއިން ޤުދުރަތީ ގޭސްވެސް އިންޑިއާއަށް ބޭރުކުރެވިދާނެކަމަށެވެ. އަދި ނިއުކްލިއަރ ހަތަކަތައިގެ ދާއިރާއިންވެސް އިންޑިއާއާއެކު އޮންނަ ގުޅުން ބަދަހިކުރެވިދާނެ މަގުތައް ހޯދަމުންދާކަމަށްވެސް އޭނާ ވިދާޅުވިއެވެ.
އިންޑިއާއާއި އެމެރިކާއާއި ދެމެދު ވިޔަފާރީގެ މަޝްވަރާތައް ކުރިއަށްދަނިކޮށް މައްސަލަ ގޯސްވީ، އިންޑިއާގެ ދަނޑުވެރިކަމުގެ ސިނާޢަތް އެމެރިކާއަށް ހުޅުވާލަން އިންޑިއާއިން އެއްބަސްނުވުމުންނެވެ. އެއާއެކު ރަޝިޔާގެ ތެޔޮ އިންޑިއާއިން ގަންނަނީކަމަށްބުނެ، އިންޑިއާއިން އެތެރެކުރާ މުދަލުން ބޮޑު ޓެރިފެއް ނަގާނެކަން އެމެރިކާއިން އިއުލާންކުރިއެވެ. މީގެ އިތުރުން އެމެރިކާއިން ޕާކިސްތާނާއެކު އޮންނަ ގުޅުން ބަދަހިކުރަމުންދާ މައްސަލައިގައިވެސް އެމެރިކާއާއިން އިންޑިއާގެ ގުޅުން ވަނީ ގޯސްވެފައެވެ.
Advertisement
This content is created and paid for by advertisers and does not involve Voice Journalists
