މީޑިއާ ބިލް ހުށަހެޅިފަހުން ކަންބޮޑުވުމެއް އައީ މިއަދު: ހަންނާނު
ރައްޔިތުންގެ މަޖިލީހަށް ހުށަހެޅި މީޑިއާ ބިލާ ގުޅޭގޮތުން ކަންބޮޑުވުމެއް ލިބިފައިވަނީ މިއަދު އެކަނިކަމަށް އެ ބިލް ހުށަހެޅުއްވި ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ހަންނާން ވިދާޅުވީ މަޖިލީހަށް ބިލް ހުށަހެޅިފަހުން މިއަދު ނޫނީ ކަންބޮޑުވުމެއް އައިސްފައިނުވާކަމަށެވެ. އެގޮތުން މިހާތަނަށް ކޯލެއްވެސް އަދި މަޝްވަރާކުރުމަކަށްވެސް ގޮވާލާފަ ނުވާކަމަށް ހަންނާން ވިދާޅުވިއެވެ. ހަންނާން ވިދާޅުވީ މި ބިލާމެދު ކަންބޮޑުވާންޖެހޭ ތަނެއް ނެތްކަމަށާއި، ބިލާމެދު ކަންބޮޑުވެގެން އުޅެނީ މަޖލީހުގައި ތިއްބަވާ އެމްޑީޕީގެ މެމްބަރުންކަމަށެވެ.
ހަންނާނު އެ ވާހަކަދެއްކެވި އިރުވެސް މަޖިލީހުގެ ތަޅުމުގައި އިދިކޮޅު މެމްބަރުން ގެންދެވީ މީޑިއާ ކޮންޓްރޯލްކުރާ ބިލް މަޖިލީހުން ބޭރުކުރުމަށް އަޑުހަރުކޮށް ގޮވާލަމުންނެވެ. އަދި މަޖިލީހުގައި މީޑިއާ ބިލާ ގުޅޭގޮތުން ވާހަކަދެކެވެމުންދިޔައިރުވެސް، މަޖިލީހުގެ އިދާރާ ބޭރުގައި ބައެއް ނޫސްވެރިން ގެންދިޔައީ ބިލާ ދެކޮޅަށް އިހުތިޖާޖުކުރަމުންނެވެ.
ނޫސްވެރިން މީޑިއާ ބިލާ ދެކޮޅަށް ކުރި މުޒާހަރާގެ ތެރެއިން...
ހަންނާން މަޖިލީހަށް ބިލް ހުށަހަޅުއްވާފައިވަނީ އޮގަސްޓްމަހުގެ 19 ވަނަ ދުވަހުއެވެ. މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ނަމުގައި ރައްޔިތުންގެ މަޖިލީހަށް ހުށަހެޅި ބިލަކީ، ރާއްޖޭގެ މީޑިއާ ބާރުވެރިކުރުމުގެ މަޤްޞަދުގައި ހުށަހެޅި ބިލެއް ކަމަށް ހަންނާން ވަނީ އެދުވަހު މަޖިލީހުގެ ޖަލްސާގައި ވިދާޅުވެފައެވެ.
ހަންނާން ބިލް ހުށަހެޅުމާއެކު ނޫސްވެރިންގެ ޖަމިއްޔާ، މޯލްޑިވްސް ޖާނަލިސްޓް އެސޯސިއޭޝަނުން ވަނީ ބިލުގައި ބޮޑެތި ކަންބޮޑުވުންތަކެއް ހުރިކަން ފާހަގަކޮށް ބިލް އަނބުރާ ގެންދިއުމަށް ގޮވާލާފައެވެ. މްޖޭއޭގެ އިތުރުން ނޫސްވެރިންގެ ބަލަދުވެރި ފަރާތް މީޑިއާ ކައުންސިލުންވެސް ވަނީ ބިލް ބޭރުކުރުމަށް ގޮވާލާފައެވެ.
މީޑިއާ ކޮންޓްރޯލް ކުރާ ބިލާ ދެކޮޅަށް މިއަދު ނޫސްވެރިން ވަނީ ރައްޔިތުން މަޖިލީހުގެ އިތުރުން، ރައީސް އޮފީސް ދޮށުގައިވެސް އިހުތިޖާޖުކުރުން ކުރިއަށްގެންގޮސްފައެވެ.
Advertisement
This content is created and paid for by advertisers and does not involve Voice Journalists
