ޖަރުމަންވިލާތުގެ ނަޒަރުގައި އިންޑިއާއަކީ އޭޝިއާ
ދުނިޔޭގެ ނިޒާމަށް އަންނަމުންދާ ބަދަލުތަކުގައި އިންޑިއާއަކީ މުހިއްމު ބައިވެރިއެއްކަމަށާއި، ޖަރުމަންވިލާތުގެ ނަޒަރުގައި އިންޑިއާއަކީ އޭޝިއާކަމަށް ޖަރުމަންވިލާތުގެ ޚާރިޖީ ވަޒީރު ޔޮހާން ވޭޑްފުލް ވިދާޅުވެއްޖެއެވެ.
އިންޑިއާއަށް ކުރެއްވި 2 ދުވަހުގެ ރަސްމީ ދަތުރުފުޅު ނިންމަވާލައްވަމުން އޭނާ ވިދާޅުވީ ޖަރުމަންވިލާތަށް އިންޑިއާ މުހިއްމުވާ ފަދައިން، އިންޑިއާއިންވެސް ޖަރުމަންވިލާތަކީ މުޅި ޔޫރަޕްކަމަށް ދެކޭކަމަށެވެ. ވިސްނުން ތަފާތު އެކި ކަންކަން ހުރިނަމަވެސް ޑިމޮކްރެޓިކް ހަމަތައް ނެގެހެއްޓުމާއި، ޤާނޫނު ހިންގުމުގައި ދެގައުމުންވެސް އެއްބަސްވާ އަދި އެއް ގޮތް ކަންތައްތަކެއް އެބަހުރިކަމަށް އޭނާ ވިދާޅުވިއެވެ. އަދި ދެގައުމުންވެސް އެއް ގައުމުގެ ވިޔަފާރިތަކަށް އަނެއް ގައުމުގެ ބާޒާރަށް ވަދެގަތުމުގެ މަގު ފަހިކޮށްދޭ، އެކަން ފަސޭހަކޮށްދޭން ޖެހޭކަމަށްވެސް ވޭޑްފުލް ވިދާޅުވިއެވެ.
އިންޑިއާއިން ޓެރަރިޒަމާއި ދެކޮޅަށް ކުރަމުންދާ މަސައްކަތުގައި ޖަރުމަންވިލާތުގެ ފުރިހަމަ ތާއީދާއި އެއްބާރުލުން ލިބޭނެކަމަށް ވިދާޅުވަމުން ޖަރުމަންވިލާތުގެ ޚާރިޖީ ވަޒީރު ވިދާޅުވީ، އިންޑިއާގެ އަމިއްލަ ދިފާޢުގައި ފިޔަވަޅުތައް އެޅުމުގެ ހައްޤު އިންޑިއާއަށް އޮންނާނެކަމަށެވެ.
ޗައިނާގެ މައްސަލައިގައި ވިލާތުގެ އިއްތިޙާދުން ގެންގުޅޭ ސިޔާސަތަކީ ޖަރުމަންވިލާތުގެވެސް ސިޔާސަތުކަން އޭނާ އިތުރަށް ހާމަކުރެއްވިއެވެ. އެގޮތުން، ތިމާވެށި ހިމާޔަތްކުރުން ފަދަ ކަންކަމުގައި ޗައިނާއަކީ ބައިވެރިއެއްކަމަށާއި، އެހެންނަމަވެސް ޗައިނާއާއި ކުރިމަތިލާންޖެހޭ ނުވަތަ ވާދަކުރަންޖެހޭ ކަންކަމަށް އިތުރުވަމުން އަންނަކަމަށް ކަންބޮޑުވުމާއެކު ވޭޑްފުލް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
