އިއްޔެ އެކަނިވެސް ފޭކް ތިން ސެޓްފިކެޓެއްގެ މައްސަލަ ފާހަގަވި: ފިޒާނާ
އިއްޔެ އެކަނި ވެސް އެކެއްގެ ނަމުގައިވާ ފޯޖުކޮށްފައިވާ ނުވަތަ ވަގު ތިން ސެޓެފިކެޓެއްގެ މައްސަލަ ފާހަގަކުރެވިފައިވާ ކަމަށް މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ މަރިޔަމް ފިޒާނާ ރަޝީދު ވިދާޅުވެއްޖެއެވެ.
އެމްކިއުއޭއަށް ވެލިޑޭޓްކުރަން ހުށަހަޅާ ވަރަށް ގިނަ ސެޓެފިކެޓުތަކަކީ ފޯޖުކޮށްފައިވާ ނުވަތަ ވަގު ސެޓެފިކެޓުކަން ފާހަގަކުރެވިފައިވާއިރު، އެކަން ސީރިއަސް މައްސަލައެއްގެ ގޮތުގައި އެމްކިއުއޭ އިން ދަނީ ބަލަމުންނެވެ.
އެގޮތުން އެމްކިއުއޭގެ ސީއީއޯ ފިޒާނާ "ވޮއިސް"އަށް ވިދާޅުވީ، ކޮންމެ ހަފުތާއެއްގައި ވެސް އެފަދަ އެތައް މައްސަލައެއް އެމްކިއުއޭއަށް ފާހަގަވާ ކަމަށާއި، އިއްޔެ އެ އިދާރާއަށް ލިބުނު ދެ ސެޓިފިކެޓަކުން ވެސް އެ މައްސަލަ ފާހަގަކުރެވުނު ކަމަށެވެ.
އެގޮތުން އެއީ ޑިގްރީ އަދި މާސްޓާސްގެ ދެ ސެޓިފިކެޓެއް ކަމަށާއި، އެ ސެޓިފިކެޓުތަކަކީ ބޭރުން ކިޔަވާފައިވާ ކަމަށް ފެންނަ ސެޓިފިކެޓުތަކެއް ކަމަށެވެ. އެ ސެޓިފިކެޓުތަކުގައި އެހެން މީހެއްގެ ވެލިޑޭޝަން ސްޓޭމް ޖަހާފައިވާ ކަމަށާއި، އެމްކިއުއޭއިން ބެލި ބެލުމުން އެ ސްޓޭމްޕުގައިވާ ނަންބަރަކީ އެހެން މީހެއްގެ ސެޓިފިކެޓެއްގައި އިން ނަންބަރެއްކަން ފާހަގަކުރެވިފައިވާ ކަމަށް ވެސް ފިޒާނާ ވިދާޅުވިއެވެ.
"ބަލާ ބެލުމަށް ވަރަށް އަސްލު އެ ސެޓިފކެޓުތައް. އެކެމަކު އަޅުގަނޑުމެން ޗެކު ކުރަނީ ސްޓޭމްޕުގައި އިންނަ ނަންބަރު.،" ފިޒާނާ ވިދާޅުވިއެވެ.
ފިޒާނާ ވިދާޅުވީ އެ މީހާގެ އިތުރު ސެޓިފިކެޓެއް ވެސް އޮންނަ ކަމުގެ މައުލޫމާތު ލިބިފައިވާ ކަމަށާއި، ނަމަވެސް މިހާތަނަށް އެ އިދާރާއަށް ލިބުނީ ދެ ސެޓިފިކެޓެއް ކަމަށެވެ. އަދި އެ މައްސަލަ މިހާރު ފުލުހުންނަށް ހުށަހަޅާފައިވާ ކަމަށް ފިޒާނާ ވިދާޅުވިއެވެ.
ސީއީއޯ ވިދާޅުވި ގޮތުގައި އެފަދަ ސެޓިފިކެޓުތައް އެ އިދާރާއަށް ލިބެނީ ސެޓިފިކެޓުތައް ފޯޖުކުރުމުގެ މައްސަލަ ބޮޑުވެފައިވާތީ، ބައެއް ކުންފުނިތަކުން އެފަދަ ސެޓިފިކެޓުތަކުގެ އަސްލު ޔަގީންކުރަން އެމްކިއުއޭއަށް ފޮނުވާތީ ކަމަށެވެ.
އަދި އެފަދަ މައްސަލަތައް ބައެއް އޮޑިޓުތަކުން ވެސް ފާހަގަވާ ކަމަށާއި، އެ މައްސަލަތައް ޙައްލުކުރުމަށް ގިނަ މަސައްކަތްތަކެއް އެމްކިއުއޭއިން ކުރަމުން އަންނަ ކަމަށް ވެސް ފިޒާނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
