ގަދަކަމުން ނޫސްވެރިން ބޭރުކޮށް މީޑިޔާ ބިލުގެ މިއަދުގެ ކޮމެޓީ ވެސް ސިއްރުކޮށްފި
ރައްޔިތުންގެ މަޖިލީހަށް ހުށަހަޅާފައިވާ މީޑިއާތައް ރެގިއުލޭޓްކުރާ ބިލު ދިރާސާކުރާ ކޮމެޓީ އަޑުއެހުމަށް ވަތް ނޫސްވެރިން ގަދަކަމުން ބޭރުކޮށް، މިއަދުގެ ކޮމެޓީ ވެސް ސިއްރުކޮށްފިއެވެ.
މަޖިލީހުގެ މަޖިލީހުގެ މިނިވަން މުއައްސަސާތަކުގެ ކޮމެޓީން ދިރާސާކުރާ އެ ބިލުގެ މަސައްކަތްތައް އިއްޔެ ވެސް ކުރިޔަށް ގެންދިޔައީ ކޮމެޓީ ސިއްރުކޮށްގެންނެވެ. އެގޮތުން އެ ކޮމެޓީ ސިއްރުކުރީ އެ ބިލަށް ގިނަ ފަރާތްތަކެއްގެ ކޮމެންޓް ލިބިފައިވާއިރު، އެ ކޮމެންޓުތައް ފޮނުވި ފަރާތްތަކުގެ ޒާތީ މަޢުލޫމާތު ހާމަކުރަން ޖެހޭ ކަމުގައި ފާހަގަކޮށެވެ.
މިއަދުގެ ކޮމެޓީ ފެށުމާއެކު ވެސް، ޒާތީ މައުލޫމާތު ހާމަކުރަންޖެހޭ ކަމުގައި ފާހަގަކުރައްވަމުން ކޮމެޓީ ސިއްރުކުރަން މެންބަރުން ވަނީ ނިންމަވާފައެވެ. އެއާއެކު އޭރު ކޮމެޓީ ހިނގަމުންދިޔަ ކޮޓަރީގައި ތިބި ނޫސްވެރިން ވަނީ، އެ ކޮމެޓީ ސިއްރުކުރަނީ މަޖިލީހުގެ ޤަވާއިދުގެ ކޮން މާއްދާއެއްގެ ދަށުންތޯ ސުވާލުއުފައްދަވާފައެވެ.
އެ ސުވާލުތަކަށް ކޮމެޓީގެ އެއްވެސް މެންބަރަކު ޖަވާބު ދެއްވާފައެއް ނުވެއެވެ. އަދި ކޮމެޓީ ސިއްރުކުރަން ނިންމުމާއެކު އެ ކޮމެޓީގައި ތިބި ނޫސްވެރިން ވަނީ އެތަނުން ގަދަކަމުން ބޭރުކޮށްފައެވެ.
މިހާރު އެ ނޫސްވެރިން ގެންދަނީ މަޖިލީހުގެ ބޭރުގައި ޚިޔާލު ފާޅުކުރަމުންނެވެ.
ފާހަގަކުރެވޭ ގޮތުގައި މަޖިލީހަށް ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު ހުށަހަޅުއްވާފައިވާ މީޑީޔާގެ ރެގިއުލޭޓަރީ ބިލާ ދެކޮޅަށް ވަރަށް ގިނަ ނޫސްވެރިން ވަނީ ޚިޔާލު ފާޅުކޮށްފައެވެ. އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މި މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.
އަދި އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައެވެ.
Advertisement
This content is created and paid for by advertisers and does not involve Voice Journalists
