3،200 ދަރިވަރުންނާއެކު އޭލެވެލްގެ ކިޔެވުން މިއަދު ފަށައިފިއެވެ.

ދައުލަތުގެ މީޑިޔާގެ ޕްރޮގްރާމެއްގައި ވާހަކަފުޅު ދައްކަވަމުން ތައުލީމާ ބެހޭ ވަޒީރު ޑރ. އިސްމައީލް ޝަފީއު ވިދާޅުވި ގޮތުގައި، މި އަހަރު އޭލެވެލް ކިޔެވުމަށް ސަރުކާރުން ކަނޑައެޅި ފަސޭހަތަކުގެ ސަބަބުން ސަރުކާރުގެ ސްކޫލުތަކަށް ކިޔަވަން ވަތް ދަރިވަރުންގެ އަދަދު 49 އިންސައްތަ އިތުރުވެފައިވާ ކަމަށެވެ.

އެގޮތުން 2023 ވަނަ އަހަރު އޯލެވެލް ނިންމި ދަރިވަރުންގެ ތެރެއިން 32 ޕަސެންޓް ނުވަތަ 2،100 ދަރިވަރުން އޭލެވެލްއަށް ވަންއިރު މިފަހަރު 49 ޕަސެންޓް ނުވަތަ 3،200 ދަރިވަރުން އޭލެވެލްއަށް ވަދެފައިވާ ކަމަށް ވަޒީރު ވިދާޅުވިއެވެ.

އަދި އެއީ ވަރަށް ބޮޑު ކުރިއެރުމެއް ކަމަށް ވެސް ވަޒީރު ވިދާޅުވިއެވެ.

ވަޒީރު ވަނީ ވަނީ އޭ ލެވެލް ފެށި ދަރިވަރުން ނަތީޖާ ނެރެން ގަދައަޅައި މަސައްކަތް ކުރަން ނަސޭހަތްތެރިވެވަޑައިގެންފަ އެވެ.

ކޮންމެ އަހަރަކު ވެސް 7،000 އެއްހާ ދަރިވަރުން އޯލެވެލް ނިންމާއިރު، އޭގެ ތެރެއިން 2،000 އެއްހާ ދަރިވަރުން އޭލެވެލް ކިޔަވާ ކަމަށް ވަޒީރު މީގެ ކުރިން ވިދާޅުވެފައިވެއެވެ.