އަހަރުގެ މިހާތަނަށް ދައުލަތުގެ ބަޖެޓުން ކުރި ހަރަދު މިދިޔައަހަރުގެ މި މުއްދަތާ އަޅާބަލާއިރު 15.5 އިންސައްތަ ދަށްކުރެވިފައިވާކަމަށް މާލީވުޒާގެ ތަފާސްހިސާބުތަކުން ދައްކައިފިއެވެ.

މިނިސްޓްރީ އޮފް ފިނޭންސް އެންޑް ޕްލޭނިންއިން ނެރެފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓްގައިވާގޮތުން މިހިނގާ ސެޕްޓެމްބަރުމަހުގެ 4 ވަނަ ދުވަހުގެ ނިޔަލަށް ދައުލަތުގެ ބަޖެޓުން ކުރި ޖުމްލަ ހަރަދުތައް ހުރީ 25.4 ބިލިއަން ރުފިޔާގައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 15.5 އިންސައްތަ ދަށްވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ދައުލަތުގެ ބަޖެޓުން ކުރި ހޭދަ އުޅެނީ 30.1 ބިލިއަން ރުފިޔާގައެވެ.

މިއަހަރުގެ މިހާތަނަށް ދައުލަތުގެ ހަރަދުތައް އެންމެބޮޑަށް ދަށްވެފައިވަނީ، ކެޕިޓަލް ހަރަދުތައް ދަށްވުމުންނެވެ. ދައުލަތުގެ ބަޖެޓްގެ މިހާތަނަށް އާއިރު ރިކަރަންޓް ހަރަދުތައް ހުރީ 22.1 ބިލިއަން ރުފިޔާގައެވެ. މިދިޔަ އަހަރުގެ މި މުއްދަތުގެ ތެރޭގައި މިއަދަދު ހުރީ 22.3 ބިލިއަން ރުފިޔާގައެވެ.

މި މުއްދަތުގެ ތެރޭގައި އެންމެބޮޑަށް ދަށްވެފައިވަނީ ކެޕިޓަލް ހަރަދުތަކެވެ. އެގޮތުން  ކެޕިޓަލް ހަރަދުތައް ވަނީ 57 އިންސައްތައަށް ދަށްވެފައެވެ. މީގެ އިތުރުން ރިކަރަންޓް ޚަރަދުގެ 56.7 އިންސައްތަ ދައުލަތުގެ އޮފީސްތަކުގެ އިދާރީ ހިންގުމާ ގުޅޭ ކަންކަމަށް ހޭދަކޮށްފައިވާއިރު، މިއީ ނިމިގެންދިޔަ އަހަރުގެ މި މުއްދަތާ އަޅައިބަލާއިރު 4.5 އިންސައްތަ ދަށް ޢަދަދެކެވެ. އެގޮތުން އޮފީސް ހިންގުމުގެ ބޭނުމަށް ހޯދާ ތަކެތީގެ ޚަރަދު 15.5 އިންސައްތައިން ދަށްވެފައިވާއިރު، މަރާމާތުކުރުމާއި މެއިންޓެނަންސްގެ ޚަރަދު ވަނީ 15.6 އިންސައްތައިން ދަށްވެފައެވެ. ހަމައެހެންމެ، ދައުލަތުގެ ބަޖެޓުން ދަތުރުފަތުރުކުރުމަށް ކުރެވޭ ހޭދަ މިވަނީ، ނިމިގެންދިޔަ އަހަރާ އަޅައިބަލާއިރު 5.8 އިންސައްތައިން ދަށްވެފައެވެ. މިއާއި އެކު ދައުލަތުން ފޯރުކޮށްދޭ އެކި އެހީ އަދި ސަބްސިޑީތައް ފޯރުކޮށްދިނުމަށް ކުރެވުނު ހޭދަ ނިމިގެންދިޔަ އަހަރާ އަޅައިބަލާއިރު 7.0 އިންސައްތައިންވަނީ ދަށްވެފައެވެ.

ރާއްޖެއަށް ކުރިމަތިވެފައިވާ މާލީހާލަތުން އަރައިގަތުމަށް ދައުލަތުގެ ހަރަދުތައް މިވަގުތަށް ކުޑަކުރުމަށް ބޭރުގެ މާލީ އިދާރާތަކުން ވަނީ ލަފާދީފައެވެ. އެގޮތުން ކެޕިޓަލް ހަރަދުތައް މިވަގުތަށް ދަށްވިނަމަވެސް، މިހާރު އިގްތިސާދު ރަނގަޅު މިސްރާބަކުން ކުރިއަށްދިއުމާއެކު ކުރިއަށްއޮތް ތަނުގައި ކެޕިޓަލް ހަރަދުތަކަށް ކުރާ ހޭދަ އިތުރުވާނޭކަމަށް ފިނޭންސުން ވަނީ ބުނެފައެވެ.