ގެދޮރުވެރިޔާ މަޝްރޫއުގެ ދަށުން ދޫކުރާ ފްލެޓްތަކަށް މިހާތަނަށް 588 މީހަކު ސެކިއުރިޓީ ޑެޕޮސިޓް ދައްކާފައިވާ ކަމަށް ފަހި ދިރިއުޅުން ކޯޕަރޭޝަން (އެފްޑީސީ)އިން ބުނެފިއެވެ.

ގެދޮރުވެރިޔާ މަޝްރޫއުގެ ފްލެޓްތަކަށް ސެކިއުރީ ޑެޕޮސިޓް ދެއްކުމުގެ ފުރުސަތު މި މަހުގެ ހަތް ވަނަ ދުވަހު ހުޅުވާލާފައިވާއިރު، "ވޮއިސް" އަށް މައުލޫމާތު ދެމުން އެފްޑީސީގެ މިޑިއާ އޮފިޝަލް ވިދާޅުވީ މިހާތަނަށް 588 މީހަކު ސެކިއުރިޓީ ޑެޕޮސިޓް ދައްކާފައިވާކަމަށެވެ. އަދި 909 މީހަކު ޑިޕޮސިޓް ފައިސާ ދެއްކުމަށް ތާވަލްކޮށްފައިވާކަންވެސް ފާހަގަކުރެއްވިއެވެ.

އެފްޑީސީން މީގެ ކުރިން ބުނެފައިވަނީ، ގެދޮރުވެރިޔާގެ ސްކީމުގެ ފްލެޓްތައް ދިނުމަށް އެންމެ ފުރަތަމަ ހަވާލުކުރާނީ ހުޅުމާލެ ދެވަނަ ފިޔަވަހި ނިރޮޅު މަގު ކައިރީގައިވާ "އަމާން އުދަރެސް"ގެ 14 ވަނަ ޓަވަރުގެ ތަޅުދަނޑިތައް ކަމަށެވެ.

އަދި ތަޅުދަނޑި ހަވާލުކުރާނީ ޓަވަރުތަކުގެ އެއްބަސްވުމުގައި ސޮއިކުރުމަށްފަހު ސެކިއުރިޓީ ޑިޕޮސިޓް ދެއްކުމަށް ގެދޮރުވެރިކަމާ ބެހޭ ވުޒާރާއިން ނަން ފޮނުވާފައިވާ މީހުންނަށް ކަމަށާއި، ނިމިފައިވާ ޓަވަރުތަކުގެ ތެރެއިން ސެކިއުރިޓީ ޑިޕޮސިޓް ފައިސާ ދައްކާ ޓަވަރުތައް ޢާންމުންނަށް ހަވާލުކުރުން ކުރިއަށްދާނެކަމަށް ވެސް އެފްޑީސީން އޭރު ބުންޏެވެ.

ގެދޮރުވެރިޔާގެ ދަށުން ޢިމާރަތްކުރަމުން އަންނަ ފްލެޓްތައް ޢިމާރަތްކުރަނީ އިންޑިޔާގެ ދެ ކުންފުންޏަކުންނެވެ. އެ ފްލެޓްތަކުގައި ދެ ކޮޓަރީގެ އެޕާޓްމެންޓްތަކާއި ތިން ކޮޓަރީގެ އެޕާޓްމެންޓުތައް ހުންނައިރު، ދެ ކޮޓަރީގެ އެޕާޓްމަންޓުތައް ދޫކުރަނީ 7،000 ރުފިޔާއަށެވެ. އެ ތަންތަނުގެ މެއިންޓެނަންސް ފީގެ ގޮތުގައި 1،000 ރުފިޔާ ނަގާއިރު، ސެކިއުރިޓީ ޑިޕޮސިޓުގެ ގޮތުގައި ދައްކަން 15،000ރ. ދައްކަން ޖެހެއެވެ.

އަދި ތިން ކޮޓަރީގެ އެޕާޓްމެންޓުތައް 9،500 ރުފިޔާއަށް ދޫކުރާއިރު، މެއިންޓެނެންސް ފީގެ ގޮތުގައި 1،5000 ރުފިޔާ އަދި ސެކިއުރޓީ ޑެޕޮސިޓްގެ ގޮތުގައި 25،000 ރުފިޔާ ދައްކަން ޖެހެއެވެ.