ވެލާނާ އިންޓަނޭޝަނަލަ އެއާޕޯޓު (ވީއައިއޭ)ގެ މައި ޕާކިން ސަރަޙައްދު ވަގުތީ ގޮތުން ޢާންމުކޮށް ހުޅުވާލައިފިއެވެ.

ވެލާނާ އެއާޕޯޓުގެ އައު ޓާމިނަލު ހުޅުވުމަށް ބޭއްވި ޚާއްސަ ރަސްމިއްޔާތާ ދިމާކޮށް އެ ޕާކިން ސަރަޙައްދު ބަންދުކުރީ މީގެ ގާތްގަޑަކަށް ދެ މަސް ކުރިންނެވެ. އެކަމާ ގުޅިގެން ވަރަށް ގިނަ ފަރާތްތަކަށް، ވަކިން ޚާއްސަކޮށް އެއާޕޯޓުގައި މަސައްކަތްކުރާ މުވައްޒަފުންނަށް ބޮޑެތި ގޮންޖެހުންތައް ކުރިމަތިވިއެވެ. އެކަމާ ގުޅިގެން ވަރަށް ގިނަ ފަރާތްތަކުން ކަންބޮޑުވުން ވެސް ފާޅުކޮށްފައިވެއެވެ.

މިހާރު އެ ޕާކިން ޒޯނު ހުޅުވާފައިވާއިރު، އެނގިފައިވާ ގޮތުގައި އެ ޒޯނު ހުޅުވާފައިވަނީ ވަކި އިންތިޒާމެއްގެ ދަށުން ވަގުތީ ގޮތުންނެވެ. އެކަން އެމްއޭސީއެލް އިން އަންގާފައިވަނީ އެ ކުންފުނީގެ މުވައްޒަފުންނަށް ފޮނުވި ސާކިއުލާއަކުންނެވެ.

އެ ސާކިއުލާގެ ސައްޚަކަން "ވޮއިސް"އަށް ކަށަވަރުކުރެވެފައިވާއިރު، އެ ސާކިއުލާގައި އެމްއޭސީއެލް އިން ބުނީ، ވީއައިއޭގެ އާ ޓާމިނަލްގެ ހުޅަނގު ފަރާތުގައިވާ ސަރަހައްދު ޕާކިން ޒޯނެއްގެ ގޮތުގައި ބޭނުންކުރުމަކީ އެއާޕޯޓުގެ ސަލާމަތާއި ރައްކާތެރިކަމަށް އެކަށީގެންވާ ގޮތެއް ނޫން ކަމަށް ފެންނާތީ، އެ ސަރަހައްދަށް ބަދަލުތައް ގެނައުމަށް އެއާޕޯޓުގެ މާސްޓާޕްލޭންގައި ހިމަނާފައި ވާނެ ކަމަށެވެ.

ނަމަވެސް އެއާޕޯޓުގެ ޚިދުމަތް ހޯދާ މީހުންނަށާއި އެއާޕޯޓުގައި މަސައްކަތްކުރާ މުވައްޒަފުންނަށާއި އެހެނިހެން އިދާރާތަކާއި ކުންފުނިތަކުގެ ފަރާތްތަކަށް ދިމާވެފައިވާ ދަތިތަކަށް ހައްލެއް ހޯދައިދިނުމުގެ ގޮތުން މި ފެށޭ ހަފުތާއިން ފެށިގެން ވަކި އުސޫލެއްގެ ދަށުން، އާ ޓާމިނަލްގެ ކުރިމަތީގައި ވަކި ސަރަހައްދެއް ޕާކްކުރުމަށް ހަމަޖައްސާފައިވާ ކަމަށް، އެމްއޭސީއެލުން ބުންޏެވެ.

އެމްއޭސީއެލުން ބުނީ، ވީއައިއޭގެ އިރުމަތީ ސަރަހައްދުގައި ޕާކިން ޒޯން ތަރައްގީކޮށް ނިމުމުން، އާ ޓާމިނަލް ކުރިމަތީގައި ޕާކްކުރުމަށް ވަގުތީގޮތުން ކަނޑައަޅާފައިވާ ސަރަހައްދު އިރުމަތީ ފަރާތަށް ބަދަލުކުރެވޭނެ ކަމަށާއި، މިހާރު ވެސް އިރުމަތީ ފަރާތުގައި ޕާކްކުރާ އުސޫލުން ޕާކްކުރެވޭނެ ކަމަށެވެ.