ޤައުމުގެ ނިންމުންތައް ނިންމުމުގައި އަންހެނުންނާއި ޒުވާނުންގެ ބައިވެރިވުން އިތުރުކޮށް، ހުރިހާ ދިވެހި ރައްޔިތުންގެ އަޑު އުފުލޭނެ ގޮތް ހެދުމަށް މަސައްކަތްކުރުން މުހިންމުކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ބައިނަލްއަގުވާމީ ޑިކޮމްރެސީ ދުވަހުގެ މުނާސަބުގައި ސޯޝަލް މީޑިޔާގައި ކުރެއްވި ޕޯސްޓެއްގައި ރައީސް ވިދާޅުވީ،  ޑިމޮކްރަސީގެ އަސާސްތަކާއި އަގުތައް ހަނދާންކުރެވޭ މި ދުވަހުގައި، ދުނިޔޭގައި އަމިއްލަ ޙައްޤުތަކަށްޓަކައި ވަކާލާތުކުރަމުންދާ އެންމެހާ ފަރާތްތަކާއެކު އެކުވެރިކަމާއެކު ތިބުން މުހިންމު ކަމަށެވެ.

އެގޮތުން ވަކިން ޚާއްސަކޮށް އަމިއްލަ ވެރިކަމެއް ކުރުމުގެ އަސާސީ މިނިވަންކަން ނިގުޅައިގަނެވިފައިވާ ފަލަސްޠީނުގެ ރައްޔިތުންނާއެކު އެކުވެރިކަމާއެކު ތިބުން ވަރަށް މުހިންމުކަމަށް ރައީސް ވިދާޅުވިއެވެ. 

އަދި ޑިމޮކްރަސީގެ އެންމެ މުހިންމު އެއް ސިފައަކީ ހުރިހާ ފަރާތްތަކެއްގެ ބައިވެރިވުން ކަށަވަރުކުރުމަށް ވާއިރު، ޤައުމުގެ ނިންމުންތައް ނިންމުމުގައި އަންހެނުންނާއި ޒުވާނުންގެ ދައުރު އިތުރުކުރުމަކީ މުހިންމު ކަމެއް ކަމަށް ރައީސް ވަނީ ވިދާޅުވެފައެވެ.