ސިވިލް ސާވިސްގެ ވަޒީފާތަކަށް މޫނު ބުރުގާ އަޅައިގެން މަސައްކަތްނުކުރެވޭ ގޮތަށް ޤަވާއިދުގައި އޮތް އޮތުން އިސްލާޙުކޮށްފިއެވެ.

ސިވިލް ސާވިސް ކޮމިޝަނުން އިއްޔެ ޢާންމުކުރި ސިވިލް ސާވިސްގެ ޤަވާއިދުގެ 13 ވަނަ އިސްލާޙުގައި ބުނާ ގޮތުން، ކުރިން އެ ޤަވާއިދުގެ 145 ވަނަ މާއްދާގައި ބަޔާންކޮށްފައިވާ "ޚިދުމަތް ލިބިގަންނަން އަންނަ ފަރާތްތަކާއި މުޢާމަލާތް ކުރާ ފަރާތްތަކަށް އެ މީހަކު ފާހަގަކޮށް އެނގެން ޖެހުން"ގެ ބައި ވަނީ އުވާލާފައެވެ.

އެގޮތުން މީގެ ކުރިން އެ ޤަވާއިދުގެ 145 ވަނަ މާއްދާގައިވަނީ:

- ސިވިލް ސަރވިސްގެ ކޮންމެ ޚިދުމަތަކީވެސް ޒިންމާދާރު ކަމާއެކު ދޭންޖެހޭ އަދި ޖަވާބުދާރީ ވާންޖެހޭ ޚިދުމަތަކަށްވެފައި ޚިދުމަތް ލިބިގަންނަން އަންނަ ފަރާތްތަކާއި މުޢާމަލާތް ކުރާ ފަރާތްތަކަށް އެ މީހަކު ފާހަގަކޮށް އެނގެން ޖެހޭނެތ،ީ ސިވިލް ސަރވިސްގެ މުވައްޒަފުން މަސައްކަތު ގަޑީގައި ހެދުން އަޅާފައި ހުންނަންވާނީ ކާކުކަން ރަނގަޅަށް އެނގޭ ފަދަ ގޮތެއްގައެވެ.

ނަމަވެސް އިއްޔެ ނެރުނު ޤަވާއިދުގައި އެ މާއްދާ އިސްލާޙުކޮށްވަނީ، ސިވިލް ސާވިސްގެ މުވައްޒަފުން ޚިދުމަތް ދިނުމުގައި ތިބެންވާނީ އެކަށީގެންވާ ހެދުމެއްގައި ކަމަށާއި، އެ ޚިދުމަތުގެ ގޮތުން ކާކުކަން އެނގެންޖެހޭ ފަދަ ޚިދުމަތެއް ދޭ މުވައްޒަފުން، އެ މުވައްޒަފުގެ ނަމާއ،ި މަގާމު އެނގޭ ގޮތަށް ކާޑު ނުވަތަ ޓެގު ބޭނުންކުރަންވާނެ ކަމަށް އިސްލާޙުކޮށްފައެވެ.

އަދި އެ ޤަވާއިދުގެ 188-1ގެ (ބ)ގެ ފަހަތަށް އިތުރު އަކުރުތަކެއް ވެސް ވަނީ އިތުރުކޮށްފައެވެ. އެގޮތުން ޚާއްސަ ސިއްޚީ ބޭނުންތަކަށް ދެވޭ ޗުއްޓީގެ މާއްދާއަށް ވަނީ، އެ މުވައްޒަފަކު ޝަރުޢީ ގޮތުން ބަލަންޖެހިފައިވާ މީހަކީ ޓާމިނަލް އިލްނެސްއެއް ނުވަތަ ކްރޮނިކް ކޮންޑިޝަނެއް ތަޙައްމަލުކުރާ ފަރާތަކަށް ވާނަމަ އެ މުވައްޒަފަކަށް 30 ދުވަހުގެ "ޚާއްސަ ސިއްޚީ ބޭނުންތަކަށް ދެވޭ ޗުއްޓީ" އެއް ދެވޭނެ ކަން ވަނީ އިތުރުކޮށްފައެވެ. 

އަދި އެ މާއްދާގައި އިތުރަށް ވަނީ އެ ޗުއްޓީ ދެވޭނެ އުސޫލުތައް ވެސް ހިމަނާފައެވެ.

ސިވިލް ސާވިސްގެ ވަޒީފާތަކަށް މޫނު ބުރުގާ އަޅައިގެން މަސައްކަތްނުކުރެވޭ ގޮތަށް ޤަވާއިދަށް ގެނައި އިސްލާޙާ ގުޅިގެން ވަރަށް ގިނަ ފަރާތްތަކުން މީގެ ކުރިން ކަންބޮޑުވުން ފާޅުކޮށްފައިވެއެވެ.