އެއްފަހަރާ އެންމެ ގިނަ މީހުން ފީނައިގެން ރެކޯޑެއް ހަދަނީ، ބައިވެރިވާން ބޭނުންތަ؟
އެއްފަހަރާ އެންމެ ގިނަ މީހުން ފީނައިގެން ގިނިސް ވްރލްޑް ރިކޯޑް ފޮތުން ޖާގަ ހޯދުމަށް ހާއްސަ ހަރަކާތެއް ބާއްވަން ނިންމައިފި އެވެ.
މިއީ ބ.އަތޮޅު ކައުންސިލާއި ވިޒިޓް މޯލްޑިވްސް ކޯޕަރޭޝަން (ވީއެމްސީ) އާ ގުޅިގެން ބާއްވާ ހަރަކާތެކެވެ. މި ހަރަކާތް އޮންނާނީ އަންނަ އޮކްޓޯބަރު މަހު 18 ވަނަ ދުވަހު "ބާނި" މި ގެ ނަމުގަ އެވެ.
ބ އަތޮޅު ވިލިނގިލިފަރު ފިނޮޅުގައި މި ހަރަކާތް ކުރިއަށް ގެންދަން ނިންމާފައިވަނީ ހާހަކަށް ވުރެ ގިނަ ބައިވެރީންނާއެކު އެވެ.
ވިޒިޓް މޯލްޑިވްސް އިން ބުނީ މި ހަރަކާތުން މި ސަރަހައްދުގެ ފަރުގެ މުއްސަނދިކަން ދުނިޔެއަށް ދައްކާލެވޭނެ ކަމަށެވެ. މި ފިނޮޅަކީ ވަރަށް ގިނަ އަދަދަކަށް ކިރު ދޫނި ޖަމާވާ ފިނޮޅެއްކަމުން، މިއީ ދުނިޔޭގެ ސަމާލުކަން ލިބޭނެ ހަރަކާތަކަށް ވާނެ ކަމަށާ މިއީ ދިވެހިރާއްޖޭގެ ޤުދުރަތީ ރީތިކަމާއި، ރާއްޖޭގެ ރަށްތަކާއި ފަރުތަކުގެ ދިރުމުގެ މުއްސަނދިކަން ދައްކާލުމަށް އެންމެ އެކަށީގެންވާ އެއް ސަރަހައްދު ކަމަށް ވެސް ވީއެމްސީން ބުނެ އެވެ.
ފީނުމުގެ ރިކޯޑް މުގުރާލުމަށް ބައިވެރިން ފީނާ ފަޅަކީ ތަފާތު ބާވަތުގެ މުރަކަ އާއި މަސްމަހާމެހިން މުއްސަނދި ފަރެއްވެސްމެ އެވެ.
މި ސަބަބުތަކާހުރެ، މި ހަރަކާތަކީ ރިކޯޑެއް މުގުރާލުމުގެ ހަރަކާތެއްގެ އިތުރުން ދުނިޔެއަށް ރާއްޖޭގެ ރީތި ކަމާއި ޤުދުރަތީ މުއްސަނދިކަން ތަފާތު ގޮތަކަށް ދައްކާލުމަށް ލިބޭ ފުރުސަތެއް ކަމަށް ވަނީ ބުނެފައިވެ އެވެ.
ރެޖިސްޓްރޭޝަން ޕޯޓަލް މެދުވެރިކޮށް "ބާނި" ހަރަކާތުގައި ބައިވެރިވުމަށް މިހާރު ރެޖިސްޓާ ކުރެވޭނެ އެވެ. އަދި 18 އޮކްޓޯބަރުގައި މިހަރަކާތުގައި ބައިވެރިވުމަށް ވިލިގިލިފަރު ފިނޮޅަށް ދަތުރުކުރުމުގެ އިންތިޒާމު ބ. އަތޮޅުގެ ކޮންމެ ރަށަކުންވެސް ހަމަޖެހޭނެ އެވެ.
Advertisement
This content is created and paid for by advertisers and does not involve Voice Journalists
