ރައްޔިތުންގެ މަޖިލީހުގައި މިހާރު އޮތް މީޑިއާ ރެގިއުލޭޓްކުރުމުގެ ބިލް ތަޅުމުން ބޭރުކޮށްދެއްވުމަށް ކުރީގެ ރައީސް އިބްރާހިމް މުހައްމަދު ސޯލިހް އިލްތިމާސްކުރައްވައިފިއެވެ.
ރައްޔިތުންގެ މަޖިލީހުން މިއަދު މީޑިއާ ރެގިއުލޭޓުކުރާ ބިލް ފާސްކުރާނޭކަމަށް ބެލެވިފައިާ މި ދަނޑުވަޅުގައި ބައެއް ނޫސްވެރިންނާއި އެނޫންވެސް ފަރާތްތަކުން ދަނީ ރައްޔިތުން މަޖިލީސް ކުރާ ގޭ ސަރަހައްދުގައި އިހްތިޖާޖުކުރަމުންނެވެ.
މިކަމާ ގުޅުވައިގެން ރައީސް ސޯލިހް އެކްސްގައި ކުރެއްވި ޕޯސްޓެއްގައ ވިދާޅުވީ، ރައްޔިތުންގެ މަޖިލީހުން ފާސްކުރުމަށް ތައްޔާރުވަމުންދާ މީޑިއާ ކޮންޓްރޯލު ބިލުގައި ނޫސްވެރިންގެ ގިނަ ކޮންބޮޑުވުންތަކެއް ހުރިކަން އެދަނީ މިހާރުވެސް ފާޅުކުރަމުންކަމަށެވެ. ރައީސް ސޯލިހް ވިދާޅުވީ އެމަނިކްފާނުގެ އިލްތިމާސަކީ ނޫސްވެރިންގެ އެ ކަންބޮޑުވުންތައް އަޑުއައްސަވާ މި ބިލު މަޖިލީހުން ބޭރުކޮށްދެއްވުންކަމަށެވެ.
މަޖިލީހުގެ ތަޅުމުން ބިލް ބޭރުކޮށްދެއްވުމަށް ރައީސް ސޯލިހް ސަރުކާރަށް ގޮވާލެއްވިއިރު، އެމަނިކްފާނު ވަނީ މީގެ ކުރިންވެސް މީޑިއާ ބިލާ ދެކޮޅަށް ވާހަކަދައްކަވާފައެވެ. އެގޮތުން ސަރުކާރުން މީޑިއާބިލް ހުށަހެޅީ ނޫސްވެރިންކަން މަރާލުމަށްކަމަށް އެމަނިކްފާނު ވަނީ ސިފަކުރައްވާފައެވެ.
ރައީސް ސޯލިހް ނިސްބަތްވެވަޑައިގަންނަވާ އެމްޑީޕީންވެސް ވަނީ ބިލް ބޭރުކުރުމަށް ގޮވާލާފައެވެ. އެގޮތުން ރައްޔިތުންގެ މަޖިލީހަށް ނިސްބަތްވެ ވަޑައިގަންނަވާ އެމްޑީޕީގެ މެމްބަރުން ވިދާޅުވަމުން ގެންދަވަނީ މީޑިއާ ބިލް ފާސްކުރަން އެްބާރުލުން ނުދޭނޭކަމަށެވެ.
އިދިކޮޅު ފަރާތްތަކުންނާއި ބައެއް ނޫސްވެރިން މީޑިއާ ބިލާ ދެކޮޅަށް ނިކުތްނަމަވެސް ސަރުކާރުން ބުނެފައިވަނީ، ބިލުގައި މީޑިއާތަކަށް ނުރައްކަލެއް ނެތްކަމަށެވެ. އެގޮތުން ހަގީގީ ނޫސްވެރިކަމަށް ބިލުން ހުރަސް ނާޅާނޭކަމަށް ސަރުކާރުގެ އިތުރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
