ރަކީދޫގެ އޭޓީއެމްއާއެކު، ވ. އަތޮޅުގެ ހުރިހާ ރަށެއްގައި އޭޓީއެމް ބަހައްޓައި ނިމިއްޖެ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވ. ރަކީދޫގެ އޭޓީއެމްގެ ޚިދުމަތް އިފްތިތާޙްކޮށްދެއްވުމާއެކު، ވ. އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ފަށައިފިއެވެ.
ވ. އަތޮޅަށް ކުރައްވަމުން ގެންދަވާ ދަތުރުުފުޅުގެ ތެރެއިން އެ އަތޮޅުގަ ރަކީދޫއަށް ވަޑައިގެން، އެ ރަށުގައި އޭޓީއެމްގެ ޚިދުމަތް ރައީސް ފައްޓަވައިދެއްވީ ދެންމެއެވެ. އެއާއެކު އެ އަތޮޅުގެ ހުރިހާ ރަށެއްގައި އޭޓީއެމްގެ ޚިދުމަތް ޤާއިމްކުރެވުނީއެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ބީއެމްއެލްގެ އޭޓީއެމްގެ ޚިދުމަތް ޤާއިމްކުރުމަކީ ރައީސްގެ ރިޔާސީ ވަޢުދުފުޅެކެވެ. އެ ވަޢުދުފުޅު ފުއްދެވުމަށްޓަކައި އެކަމުގެ ޢަމަލީ މަސައްކަތްތައް ފައްޓަވާފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. އެ މަޝްރޫއު ފެށުނު މަހުން މިހާތަނަށް ގއ، ހދ، އއ، ބ އަދި ށ އަތޮޅުގެ ހުރިހާ ރަށެއްގައި އޭޓީއެމްގެ ޚިދުމަތްތައް ވަނީ ފަށާފައެވެ.
އަދި މި އަހަރު ނިމުމުގެ ކުރިން ބީއެމްއެލްގެ 250އަށް ވުރެ ގިނަ އޭޓީއެމް ރާއްޖޭގެ އެކި ކަންކޮޅުތަކުގައި ޤާއިމްކުރުމަށް ސަރުކާރުން ވަނީ އަމާޒުހިފާފައެވެ.
ރައީސް ވ. ރަކީދޫއަށް މިއަދު ވަޑައިގަންނަވައިފައިވާއިރު، އެ ރަށުގެ ރައްޔިތުންނާއެކު މަޝްވަރާ ބައްދަލުވުމެއް ބާއްވަވާނެއެވެ. އަދި އެއަށް ފަހު ފ. ބިލެއްދޫ، ފ. ފީއަލީ، ފ. ނިލަންދޫ އަށް މިއަދުގެ ވަގުތެއްގައި ވަޑައިގަންނަވާނެއެވެ. މި ރަށްތަކުގައި ތަރައްގީގެ މަޝްރޫއުތައް ފައްޓަވައިދެއްވުމާއެކު، ބައެއް ތަރައްގީގެ މަޝްރޫއުތަކުގައި ސޮއިކުރައްވައި އަދި ރައްޔިތުންނާއި ބައްދަލުކުރައްވައި ވާހަކަފުޅު ދައްކަވާނެއެވެ.
Advertisement
This content is created and paid for by advertisers and does not involve Voice Journalists
