ޣައްޒާގެ އިންސާނީ ޙާލަތަކީ މިހާތަނަށް ފެނުނު އެންމެ ނިކަމެތި އަދި ހިތާމަވެރި ޙާލަތު: ގުޓަރެޒް
ނިރުބަވެރި ޔަހޫދީ ދައުލަތް، އިޒްރޭލުން ހަމާސްއަށް ކަމަށް ބުނެ ޣައްޒާގެ ކުށެއްނެތް ޢާންމުންނަށް ދެމުންދާ ޙަމަލާތަކާ ގުޅިގެން ޣައްޒާގައި ދިމާވެފައިވާ އިންސާނީ ކާރިސާއަކީ މިހާތަނަށް ފެނުނު އެންމެ ހިތާމަވެރި އަދި ނިކަމެތި ކާރިސާކަމަށް އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވިދާޅުވެއްޖެއެވެ.
ގުޓެރެސް އެހެން ވިދާޅުވީ، އދ.ގެ 80 ވަނަ އާންމު މަޖިލީހުގެ ޖަލްސާގެ ކުރިން އޭއެފްޕީއަށް ދެއްވި ޚާއްސަ އިންޓަވިއުއެއްގައެވެ.
ގުޓެރެސް ވިދާޅުވި ގޮތުގައި ޣައްޒާގައި މިވަގުތު އޮތީ ބަނޑުހައިހޫނުކަން ކަމަށާއި، ސިއްހީ ޚިދުމަތްތައް މުޅިން ހުއްޓި، ގިނަ އަދަދެއްގެ މީހުން ކުޑަ ސަރަހައްދެއްގައި އެކަށީގެންވާ ހިޔާވަހިކަމެއް ނެތި ދިރިއުޅެމުންދާ ކަމަށެވެ.
"މިއީ އަޅުގަނޑުގެ މަޤާމުގައި ހުރެ ދެކުނު އެންމެ ހިތާމަވެރި އަދި ނިކަމެތި ޙާލަތު. އަދި ފަހަރުގައި އަޅުގަނޑުގެ މުޅި ދިރިއުޅުމުގައިވެސް ދެކުނު އެންމެ ނުރައްކާތެރި ހާލަތު،" ގުޓެރެސް ވިދާޅުވިއެވެ.
ގުޓަރެސް ވަނީ ފަލަސްތީނުގެ ދައުލަތެއް ބައިނަލްއަޤްވާމީ މުޖުތަމައުއިން ބަލައިގަތުމާ ގުޅިގެން ޔަހޫދީ ދައުލަތުން ހުޅަނގު އައްސޭރީގެ ބައެއް ސަރަޙައްދުތައް ހިފާފާނެ ކަމުގެ ކަންބޮޑުވުން ފާޅުކޮށްފައެވެ. އަދި އޭނާ ވަނީ އިޒްރޭލުގެ ކުރިމަތީގައި މުޅި ދުނިޔެ ކުޑަކަކޫ ނުޖެހުމަށް ގޮވާލާފައެވެ.
ގުޓަރެސް ވިދާޅުވި ގޮތުގައި ފަލަސްތީނު ދައުލަތެއް ބަލައިގަތުމާ ނުގަތުމާ ނުލައިވެސް އިޒްރޭލުން އެފަދަ ޖަރީމާތައް ހިންގާނެއެވެ. އެހެން ނަމަވެސް ބައިނަލްއަޤްވާމީ މުޖުތަމައު އެއްބައިވެ، އިތުރު ގޯސްތަކެއް ހުއްޓުވުމަށް މަސައްކަތްކުރުމުގެ ފުރުސަތު މިހާރު ލިބިފައިވާ ކަމަށް ގުޓަރެޒް ވިދާޅުވިއެވެ.
ގުޓަރެޒް އެފަދައިން ވިދާޅުވިއިރު، މިހާރު ވެސް އިޒްރޭލުން ވަނީ ހުޅަނގު އައްސޭރީގެ ބޮޑު ބައެއް ހިފައި، ޣައިރު ޤާނޫނީ ޔަހޫދީ ވަޒަންވެރިން އެތަނުގައި ވަޒަންވެރިކުރަން އިއުލާނުކޮށްފައެވެ. މިކަން އިޒްރޭލުން ފަށާފައިވަނީ ހުޅަނގުގެ ޤައުމުތަކުން ފަލަސްތީނުގެ މިނިވަން ދައުލަތެއް ޤާއިމްކުރުމަށް މަސައްކަތްކުރަނިކޮށް، އެ ޤައުމުތަކުން އެ މަސައްކަތްތައް ކުރާނަމަ ހުޅަނގު އައްސޭރި ހިފާނެ ކަމުގެ އިންޒާރުދީފައިވަނިކޮށެވެ.
އިޒްރޭލާއި އެ ދައުލަތަށް އެންމެ ވާގިވެރިވާ އެމެރިކާގެ އިންޒާރުތަކާއެކު ވެސް، މި މަހު އިނގިރޭސިވިލާތް އަދި ފްރާންސް ހިމެނޭ ގޮތަށް ހުޅަނގުގެ ގިނަ ސަރުކާރުތަކުން ވަނީ އދ.ގައި ފަލަސްތީނު ދައުލަތް ބަލައިގަންނާނެ ކަމަށް އިޢުލާނުކޮށްފައެވެ.
އެހެން ނަމަވެސް، ރޭ ބޭއްވި އދ.ގެ ސަލާމަތީ މަޖިލީހުގެ ޖަލްސާގައި ޣައްޒާގައި އިސްރާއީލުން ކުރަމުންދާ ހަނގުރާމަ ހުއްޓާލުމަށް ގޮވާލައި ހުށަހެޅި ޤަރާރު ވެސް އެމެރިކާއިން ވަނީ ވީޓޯކޮށްފައެވެ. އެ ޖަލްސާގައި އެމެރިކާ ނޫން ހުރިހާ މެންބަރު ޤައުމުތަކުން ވަނީ އެ ޤަރާރާ އެއްކޮޅަށް ވޯޓު ދީފައެވެ.
Advertisement
This content is created and paid for by advertisers and does not involve Voice Journalists
