އެހެން ރަށަކަށް ބަދަލުވާން ވ. ރަކީދޫގެ 80 އިންސައްތަ ރައްޔިތުން ތާއީދުކުރާނަމަ އެހެން ރަށަކަށް ބަދަލުކޮށްދެއްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް އެފަދައިން ވިދާޅުވީ މިއަދު ރަކީދޫގެ ރައްޔިތުންނާއި ރައީސް ބައްދަލުކުރައްވައި، އެ ރައްޔިތުންގެ ޚިޔާލު ހޯއްދެވުމަށް ބޭއްވި ޚާއްސަ ބައްދަލުވުމުގައެވެ. 

އެގޮތުން އެ ބައްދަލުވުމުގައި އެރަށުގެ ރައްޔިތުން ވަނީ  މާލެ ކައިރިން އަލަށް ތަރައްޤީކުރާ ރަށަކަށް ރަށުގެ ރައްޔިތުންގެ ދިރިއުޅުން ބަދަލުކުރަން ބޭނުންވާކަމަށް ބުނެފައެވެ.  އެގޮތުން ރަސްމާލެ، ގުޅިފަޅު ނުވަތަ އެނޫންވެސް، ދިރިއުޅުމުގެ ވަސީލަތްތައް ފުރިހަމަ، މާލެ ކައިރި ތަނަކަށް ހިޖުރަކުރެވޭނެ މަގު ފަހިކޮށްދިނުމަށް އެ ރަށުގެ ރައްޔިތުން ވަނީ އެދިފައެވެ.

އޭގެ ތެރެއިން އެ ބައްދަލުވުމުގައި އެއް ބޭފުޅަކު ވަނީ، ރަކީދޫން މީހުން ބަދަލުވުމާ ގުޅޭ ގޮތުން ވާހަކަ ދައްކަން ހައުސިން މިނިސްޓްރީގެ ޓީމެއް މިދިޔަ ހަފުތާގައި އެ ރަށަށް ދިޔަ ކަމަށް ބުނެފައެވެ. އެ ބައްދަލުވުމުގައި ވެސް ގިނަ ބަޔަކު ހުށަހެޅީ ރަށުން ބަދަލުވާން ކަމަށް އޭނާ ބުންޏެވެ. 

ރައީސް ޑރ. މުޙައްމަދު މުޢިއްޒު ވ. ރަކީދޫގެ ރައްޔިތުންނާއި ބައްދަލުކުރައްވަނީ -- ވޮއިސް ފޮޓޯ

އޭނާ ފާހަގަކުރި ގޮތުގައި އެ ރަށުގައި މިވަގުތު ދިރިއުޅެނީ 61 މީހުންނެވެ. އޭގެ ތެރެއިން 41 މީހުން ވަނީ ތުލުސްދޫއަށް ބަދަލުވާން އެދިފައިކަމަށް އޭނާ ބުންޏެވެ. އަދި ބާކީ 19 މީހުން އެދުނީ މާލެ ކައިރިން ތަނެއް ހިއްކައިގެން ބަދަލުވުމަށްކަމަށް އޭނާ ބުންޏެވެ.

އެ ކަންބޮޑުވުންތައް އަޑު އައްސަވައި ރައީސް ވިދާޅުވީ، އެރަށުން ހިޖުރަކުރުމުގައި ރައްޔިތުންގެ ޚިޔާލު ވަރަށް ސާފުކަމަށާއި، އެ ރަށުން ހިޖުރަކުރުމަށް ރައްޔިތުން ބޭނުންވާގޮތް ދެނެގަތުމަށް، ރަސްމީކޮށް މަސައްކަތްތައް ގެންދަވާނެކަމަށެވެ. 

އަދި ދި ރައްޔިތުންގެ ޚިޔާލާއެކު ރަށުން ބަދަލުވާން ނިމިއްޖެނަމަ، ރައްޔިތުން ބަދަލުކޮށްދެއްވާނީ ވަސީލަތްތަކާ ޚިދުމަތްތައް ފުރިހަމަތަނަކަށް ކަމަށާއި، ދިރިއުޅެވޭނެ ގެއާއި، ހިޖުރަކުރުމަށް ސަރުކާރުން ދޭންޖެހޭ ބަދަލުވެސް ދެއްވާނެކަމަށް ރައީސް ވިދާޅުވިއެވެ.

އެކަމަށް އެ ރަށުގެ 80 އިންސައްތަ ރައްޔިތުންގެ ތާޢީދު ބޭނުންވާކަމަށް ރައީސް ވިދާޅުވިއެވެ.

ރައީސް ޑރ. މުޙައްމަދު މުޢިއްޒު ވ. ރަކީދޫގެ ރައްޔިތުންނާއި ބައްދަލުކުރައްވާ ޖަލްސާގެ ތެރެއިން -- ވޮއިސް ފޮޓޯ

ރައީސް އެފަދައިން ވިދާޅުވިއިރު، މިއީ ރަކީދޫގެ ރައްޔިތުން ބަދަލުވާން އެދުނު ފުރަތަމަ ފަހަރުނޫންކަން ފާހަގަކުރެވެއެވެ. މީގެ ކުރީގެ ސަރުކާރުތަކުގައި ވެސް އެ ރައްޔިތުން އެފަދައިން އެދުނު ނަމަވެސް، އެކަމަށް ޙައްލެއް ހޯދެވިފައިނުވާކަން މިއަދުގެ ބައްދަލުވުމުގައި ވެސް އެރަށުގެ ރައްޔިތުން ވަނީ ފާހަގަކޮށްފައެވެ.

ރަކީދުގެ ރައްޔިތުން އެފަދައިން އެދުނުއިރު، 2022 ވަނަ އަހަރުގެ ސެންސަސް އިން ދައްކާ ގޮތުން ރާއްޖޭގެ އެންމެ އާބާދީ ކުޑަ ރަށަކީ ވެސް ރަކީދޫއެވެ. ރަކީދޫގެ އާބާދީއަކީ 360އެއްހާ މީހުން ނަމަވެސް ރަށުގައި ދިރިއުޅޭ އާބާދީއަކީ 60އެއްހާ މީހުންނެވެ. އަދި ސްކޫލް އުމުރުގެ ކުދިންވެސް ނޫޅެއެވެ. ރަށުގެ ބޮޑު އާބާދީއަކީ އުމުރުން ދުވަސްވީ މީހުންނެވެ.