ފ. ބިލެއްދޫގެ އައުޓްޑޯ ވޮލީކޯޓާއި މަގު ހެދުމުގެ މަޝްރޫއު ސަރުކާރުގެ ފަރާތުން އެމްޓީސީސީއާ ހަވާލުކޮށްފިއެވެ.

އެ އެއްބަސްވުމުގައި ސޮއިކޮށްފައިވަނީ ރައީސް ޑރ. މުޙައްމަދު މުޢިއްޒު، އަތޮޅުތެރެއަށް ކުރައްވަމުންގެންދަވާ ދަތުރުފުޅުގެ ތެރެއިން ނިލަންދެ އަތޮޅު އުތުރުބުރީގެ ބިލެއްދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވުމަށް މިއަދު ބޭއްވި ޚާއްސަ ޖަލްސާގައެވެ.

މި ޖަލްސާގައި މަގޫދޫގެ އައުޓްޑޯ ވޮލީކޯޓުގެ މަޝްރޫއުގައި ސަރުކާރުގެ ފަރާތުން ސޮއިކުރެއްވީ ކުޅިވަރާއި ހަށިހެޔޮކަމާއި ބެހޭ ވަޒީރު ޑރ. އަބްދުﷲ ރާފިއުއެވެ. އަދި އެމްޓީސީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު ޑީސީޕީ ރިޓެޔާޑް. އަޙްމަދު ސަޢުދީއެވެ.

އެމްޓީސީސީން ބުނި ގޮތުގައި، އެ މަޝްރޫއުގެ ދަށުން ކޮންކްރީޓް އަދި ބައުންޑްރީ ފެންސް ޖެހުމުގެ މަސައްކަތާއި، އިކުއިޕްމެންޓްތައް ހަރުކުރުން ހިމެނެެއެވެ. ޖުމްލަ 1.24 މިލިއަން ރުފިޔާއަށް މި މަސައްކަތް ހަވާލުކުރީ 120 ދުވަސް ތެރޭގައި ނިންމާ ގޮތަށެވެ.

މީގެ އިތުރުން، އެ ރަށުގެ މަގު ހެދުމުގެ މަޝްރޫގައި ސަރުކާރުގެ ފަރާތުން ސޮއިކުރެއްވީ ގެދޮރުވެރިކަމާއި ބިނާރާ ބެހޭ ވަޒީރު، ޑރ. އަބްދުﷲ މުއްތަލިބުއެވެ. އަދި އެމްޓީސީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު ޑީސީޕީ ރިޓެޔާޑް. އަޙްމަދު ސަޢުދީއެވެ.

ޖުމްލަ 91.20 މިލިއަން ރުފިޔާއަށް މި މަޝްރޫއު ހަވާލުކުރީ 720 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.

މީގެ އިތުރަށް ވެސް މިއަދު ވަނީ ބިލެއްދޫގެ ބަނދަރުގެ އަޕްގްރޭޑްކުރުމުގެ މަސައްކަތް ވެސް އެމްޓީސީސީއާ ހަވާލުކޮށްފައެވެ. އަދި ޕޮލިސް ސްޓޭޝަނުގެ މަސައްކަތާއި، ސިއްޚީ މަރުކަޒުގެ އައު އިމާރާތުގެ މަސައްކަތުގެ އިތުރުން، އެ ރަށުގައި ބަހައްޓާ ބީއެމްއެލްގެ ޚިދުމަތް ވެސް މިއަދު ވަނީ ފަށާފައެވެ.