އދ.މަހިބަދޫގައި ހަދަމުންދިޔަ އިމާރާތަކުން ބިދޭސީއަކު ވެއްޓި ސީރިއަސް ހާލަތެއްގައި
އދ.މަހިބަދޫގައި ހަދަމުންދިޔަ އިމާރާތަކުން ބިދޭސީއަކު ވެއްޓި އެމީހާއަށް ބޮޑެތި އަނިޔާތަކެއް ލިބިއްޖެއެވެ.
މި ހާދިސާ ހިނގާފައިވަނީ މިއަދުގެ ހެނދުނުގެ ވަގުތެއްގައެވެ. ވޮއިސްއަށް މައުލޫމާތު ހިއްސާކުރަމުން ހާދިސާގެ މައުލޫމާތު އެނގޭ އެރަށު ރައްޔިތަކު ބުނީ އެމީހާ ވެއްޓުނީ ހަދަމުންދިޔަ އިމާރާތެއްގެ ދެވަނަ ފަންގިފިލައިންކަމަށް ބެލެވޭކަމަށެވެ.
އޭނާ ވެއްޓުނުތަނުގައި ވަރަށް ބައިވަރު ލޭގެ އިތުރުން ދަތާއި އެނޫންވެސް އެތިކޯކޮޅު ހުރިކަމަށް މައުލޫމާތު ދިން މީހާ ބުންޏެވެ. އަދި އެމީހާގެ މޫނުއޮތީ ކާކުކަން ވަކިނުވާވަރަށް ޒަހަމްވެފައެވެ. އިމާރާތުގެ މަތިން އެމީހާ ވެއްޓުމާއެކު، ހޮސްޕިޓަލަށް ގެންދިޔައީ ރަށުޕިކަޕަކަށް ލައިގެންނެވެ. މައުލޫމާތު ލިބޭ ގޮތުގައި އޭނާ އެވަގުތު މަސައްކަތް ކުރަމުން ދިޔައީ ސަލާމަތީގޮތުން އަޅަންޖެހޭ އެއްވެސް ފިޔަވަޅެއް ނާޅައެވެ
ލިބިފައިވާ ޒަހަމްތައް ބޮޑުކަމުން އެމީހާ ވަނީ 10:30 ހާއިރު މާލޭކޮޅަށް ފޮނުވާލާފައެވެ.
މިކަމާ ގުޅޭގޮތުން ފުލުހުން ބުނެފައިވަނީ މަހިބަދޫ ގެއެއްގައި ކޮންސްޓްރަކްޝަން މަސައްކަތްކުރަން އުޅުނު އިންޑިއާގެ ރައްޔިތަކު މަސައްކަތްކުރަން ހުރި ތަނުގެ ދެވަނަ ފަންގިފިލައިން ވެއްޓި އަނިޔާވިކަމުގެ ރިޕޯޓެއް ލިބިފައިވާކަމަށެވެ. އެ ހާދިސާގެ މައުލޫމާތު ފުލުހުންނަށް ލިބުނީ ހެނދުނު 09:29 ހާއިރުއެވެ.
މި މައްސަލަ ފުލުހުން ދަނީ ތަހްގީގްކުރަމުންނެވެ.
Advertisement
This content is created and paid for by advertisers and does not involve Voice Journalists
