ހުޅުމާލެ ހިޔާ އަވަށުގައި ގާއިމްކޮށްފައިވާ ހުޅުމާލެ ހޮސްޕިޓަލްްގެ ޖެނެރަލް ޕްރެކްޓިސް ކްލިނިކުން 24 ގަޑިއިރު ހިދުމަތް ދޭ ގޮތަށް ބަދަލުކޮށްފި އެވެ.

ބޮޑު އާބާދީ އޮތް ހިޔާ އަވަށުގައި އަދި ހޮސްޕިޓަލެއް ނެތެވެ. ހުޅުމާލެ ހޮސްޕިޓަލްްގެ ޖެނެރަލް ޕްރެކްޓިސް ކްލިނިކަކާއި ބައެއް އަމިއްލަ ކްލިނިކްތައް ހިންގަ އެވެ.

އެހާ ބޮޑު އާބަާދީއެއް އެތަނުގައި އޮތްއިރު 24 ގަޑިއިރު ސިއްހީ ހިދުމަތް ލިބެން ނެތުމަކީ އާންމުންގެ ކަންބޮޑުވުމެކެވެ.

ހުޅުމާލެ ހޮސްޕިޓަލް ހިންގާ މާލޭ ގްރޫޕް އޮފް ހޮސްޕިޓަލްސްގެ ސީއީއޯ އަބްދުއްރައްޒާގް ހަލީމް ވިދާޅުވި ގޮތުގައި ހުޅުމާލެ ހޮސްޕިޓަލްްގެ ޖެނެރަލް ޕްރެކްޓިސް ކްލިނިކުން 24 ގަޑިއިރު ހިދުމަތް ދޭ ގޮތަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާތީ، މިރެއިން ފެށިގެން 24 ގަޑިއިރުގެ ސިއްހީ ޚިދުމަތް ފޯރުކޮށްދޭން ކަމަށެވެ.

ހުޅުމާލެ ހޮސްޕިޓަލްްގެ ޖެނެރަލް ޕްރެކްޓިސް ކްލިނިކް -- 

އަދި ވިދާޅުވީ ސިއްހީ ދާއިރާ ތަރައްގީ ކުރުމަށް ކުރަމުންދާ މަސައްކަތުގެ ތެރެއިން، ކުރިން އެންމެ ޝިފްޓެއްގައި ހިންގަމުން އައި މި ކްލިނިކް، 2024 ވަނަ އަހަރުގެ އޭޕްރީލް މަހުގެ 23 ވަނަ ދުވަހު ދެ ޝިފްޓަށް ފުޅާކުރެވުނު ކަމަށާ އަދި މިރެއިން ފެށިގެން މި ކްލިނިކުން ހުކުރު ދުވަސް ފިޔަވައި ހަފުތާގެ ކޮންމެ ދުވަހަކު 24 ގަޑިއިރު ހިދުމަތް ލިބޭނެ ކަމަށެވެ.

"މި ކަމުން ހުޅުމާލެ ފޭސް ދޭއް ގައި ދިރިއުޅުއްވާ ރައްޔިތުންނަށް އިތުރު ލުއި ފަސޭހަތަކެއް ލިބިގެންދާނެ. މި ފިޔަވަޅުގެ ސަބަބުން މި ސަރަހައްދުގެ ކޮންމެ އާއިލާއަކަށްވެސް އުންމީދާއި، ހިތްހަމަޖެހުމާއި، އިތުބާރުހުރި ސިއްހީ ފަރުވާ ގާތުން ލިބިގެންދާނެ," ހަލީމް ވިދާޅުވި އެވެ.