މާވަށު މަރުގެ މައްސަލަ: މުޙައްމަދުގެ މައްޗަށް ދައުވާކުރަން ޕީޖީއަށް ފޮނުވައިފި
މިދިޔަ ޖުލައި މަހުގެ 28 ވަނަ ދުވަހު ލ. މާވަށުގައި ހިނގި ތޫނު އެއްޗަކުން ހަމަލާދީ މީހަކު މަރާލި މައްސަލައިގައި ދައުވާކުރާ މުޙައްމަދު އިބްރާހިމްގެ މައްޗަށް ދައުވާކުރަން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ޕީޖީއަށް ފޮނުވި މައްސަލައަކީ މިދިޔަ ޖުލައި މަހުގެ 28 ވަނަ ދުވަހު އެ ރަށު ނަލަހިޔާ 29 އަހަރުގެ މޫސާ އިބްރާހިމް މަރާލި މައްސަލައިގައި ދައުވާކުރުމަށް ފޮނުވި މައްސަލައެވެ. އެ މައްސަލައިގައި ދައުވާ އުފުލަނީ ހ. ނޮޅިވަރަންފަރު / އަސްރީމަންޒިލް، މުޙައްމަދު އިބްރާހީމް (29 އަހަރު)ގެ މައްޗަށެވެ. އޭނާގެ މައްޗަށް ދައުވާކުރަން ޕީޖީއަށް ފޮނުވާފައިވަނީ މިދިޔަ ބުދަ ދުވަހުގެ ވަގުތެއްގައެވެ.
އެ މައްސަލައިގައި އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ޝަރީއަތް ނިމެންދެން ބަންދުކޮށްފައި ބެހެއްޓުމަށް ކޯޓުން ވަނީ އަމުރުކޮށްފައެވެ.
ފުލުހުންގެ ރިޕޯޓުތަކުން ދައްކާގޮތުގައި އެ ހާދިސާ ހިނގާފައިވަނީ އެރޭ 10:12 ހާއިރުއެވެ. ހަމަލާ ލިބުނު މޫސާ އިބްރާހީމް ވަނީ ފަރުވާއަށް ރަށު ހޮސްޕިޓަލަށް ގެންގޮސްފައެވެ. ގެންދިޔައިރު ވެސް އޭނާ ވަނީ ނިޔާވެފައެވެ.
Advertisement
This content is created and paid for by advertisers and does not involve Voice Journalists
