ހައިކޯޓްގެ ފަނޑިޔާރު ކަމަށް އިސްގާޒީ މާހިރު އައްޔަނު ކުރައްވައިފި
ހުސްވެފައިވާ ހައިކޯޓުގެ ފަނޑިޔާރު ކަމަށް ރ. އަލިފުށި, މެޑޯޒް އިބްރާހިމް މާހިރު އައްޔަނު ކުރައްވައިފި އެވެ.
ހައިކޯޓްގެ ފަނޑިޔާރު ކަމުގެ މަގާމަށް ހުޅުވާލީ ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު މުޙައްމަދު ޝަހީދުގެ ނަން ކަނޑައަޅާފައި ވަނިކޮށް އޭނާގެ ނަން އަނބުރާ ގެންދިއުމުންނެވެ. އޭނާގެ ނަން ގެންދިޔައީ އަމާޒުވި ފާޑުކިޔުންތަކާއި ގުޅިގެންނެވެ. ފަނޑިޔާރު ކަމަށް އޭނާ ކުރިމަތިލުމުން ވެސް އަދި ޖޭއެސްސީން އޭނާގެ ނަން ކަނޑައެޅުމުން ވެސް ވަރަށް ގިނަ ބަޔަކު ފާޑުކިޔެވެ.
ހައިކޯޓްގެ ފަނޑިޔާރު ކަމަށް އިސްގާޒީ މާހިރު އައްޔަނު ކުރެއްވުން -- ފޮޓޯ: ހައިކޯޓް
އެހެން ކަމުން އަލުން ފަނޑިޔާރު ކަމަށް ހުޅުވާލި އެވެ. އެ ފުރުސަތުގައި ނުވަ މީހަކު ކުރިމަތިިލި އެވެ.
ޖޭއެސްސީން މިއަދު އޮތް ބައްދަލްވުމުގައި ނިންމީ އެ މަގާމަށް އިބްރާހިމް މާހިރު އައްޔަނު ކުރުމަށެވެ.
މާހިރު މިހާތަނަށް ހުންނެވީ ފެމެލީ ކޯޓްގެ އިސް ގާޒީގެ މަގާމުގަ އެވެ. ޖޭއެސްސީގެ ނިންމުމާ އެކު މާހިރު ވަނީ ހައިކޯޓްގެ ފަނޑިޔާރު ކަމަށް އައްޔަނު ކުރައްވާފަ އެވެ.
ހައިކޯޓްގެ ފަނޑިޔާރު ކަމަށް އިސްގާޒީ މާހިރު އައްޔަނު ކުރެއްވުން -- ފޮޓޯ: ހައިކޯޓް
ޖޭއެސްސީގައި މިއަދު އޮތް ބައްދަލްވުމެއްގައި މާހިރު ވަނީ ހައިކޯޓްގެ ފަނޑިޔާރު ކަމުގެ ހުވާ ކުރައްވާފަ އެވެ. އަދި މަގާމަށް އައްޔަނުކުރައްވާ ލިޔުން ހަވާލުކޮށްދެއްވީ ޖޭއެސްސީގެ ރައީސް ހުސަައިން ރިޒާ އެވެ.
Advertisement
This content is created and paid for by advertisers and does not involve Voice Journalists
