އިސްރާއީލުން އަތްގަދަކުރަމުންގެންދާ ފަލަސްތީނުގެ ވެސްޓްބޭންކް މައްސަލާގައި އެމެރިކާގެ ރައީސް ޑޮނާލްޑް ޓްރަމްޕާ ޔަހޫދީންނާދެމެދު އަރާރުމަކަށް ހިނގައްޖެއެވެ.

ވެސްޓްބޭންކަކީ ފަލަސްތީނުގެ ސަރަރުތަކުގެ ތެރެއިން އިސްރާއީލްގެ ބާރުގެ ދަށަށް ގެނައުމަށް އެންމެ ފުރަތަމަ މަސައްކަތްކުރަން ފެށި އެއް ސަރަހައްދެވެ. އިސްރާއީލުން ވެސްޓްބޭންކް ހިފުމަށް އެކި ގޮތްގޮތުން މަސައްކަތްކުރަމުންގެންދާތާ ބައި ގަރުނަށްވުރެ ގިނަ ދުވަސް ވަނީ ވެފައެވެ.

ވެސްޓްބޭންކް މައްސަލާގައި އިއްޔެ އެމެރިކާގެ ރައީސް ޓްރަމްޕް ވިދާޅުވެފައިަވަނީ އިސްރާއީލުން ވެސްޓްބޭންކް ހިފުމަށް ކުރަމުންގެންދާ މަސައްކަތްތައް މިހާރު ހުއްޓާލަން ވެއްޖެކަމަށެވެ. އެގޮތުން އިސްރާއީލް ސިފައިން ވެސްޓް ބޭންކް ހިފުމަށް މިހާރު ކުރަމުންގެންދާ މަސައްކަތްތަކަށް އެމެރިކާއިން ތާއީދު ނުކުރާނޭކަމަށް ޓްރަމްޕް ވަނީ ތަކުރާރުކޮށް ވިދާޅުވެފައެވެ.

ވެސްޓްބޭންކަށް ވެރިވެގަތުމަށް ނަތަންޔާހޫ ކުރަމުންގެންދާ މަސައްކަތްތައް ހުއްޓުވުމަށް އެއްވެސް ވަރަކަށް މަޝްވަރާކުރެވިފައިވޭތޯ ނޫސްވެރިއަކު ކުރި ސުވާލެއްގެ ޖަވާބުގައި ޓްރަމްޕް ވަނީ ސީދާ ސުވާލަށް ޖަވާބު ނުދެއްވައި މަޝްވަރާކުރިއަސް ނުކުރިއަށް އެކަން މިހާރު ހުއްޓާލަންޖެހޭކަމަށް ވިދާޅުވެފައެވެ. 

ޓްރަމްޕް މިމޭރުމުން ވާހަކަފުޅު ދައްކަވާފައިމިވަނީ މިއަދު ނިއުޔޯކްގައި ހުންނަ އދ ގެ މަރުކަޒުގައި އިސްރާއީލްގެ ބޮޑުވަޒީރު ނަތަންޔާހޫ ވާހަކަދެއްކުމަށް ތައްޔާރުވަމުންދަނިކޮށްކަމަށް އަލްޖަޒީރާއިން ވަނީ ބުނެފައެވެ.

ވެސްޓްބޭންކް މައްސަލާގައި އެމެރިކާގެ ރާގު ކުއްލިއަކަށް ބަދަލުވެފައިވާއިރު، މީގެ އަހަރުތަކެއް ކުރިންވެސް އިސްރާއީލުން ވަނީ ވެސްޓްބޭންކް ހިފުމުގައި އެމެރިކާގެ އެއްބާރުލުން ނުލިބޭނޭކަމަށް ބުނެފައެވެ. އެކަން އެގޮތަށް އޮތްނަމަވެސް އިސްރާއީލުން ދިޔައީ ވެސްޓްބޭންކްގައި ޔަހޫދީ އާބާދީތައް ވަރުގަދަ ކުރަމުންނެވެ. އަދި މިކަމުގައި އެމެރިކާގެ އެއްބާރުލުންވެސް ލިބެމުންދިޔައެވެ. 

ވެސްޓްބޭންކްގައި އިސްރާއީލުން ޔަހޫދީން އާބާދުކުރަމުންދަނީ ބައިނަލްއަޤްވާމީގޮތުން ހެދިފައިހުރި ޤާނޫނުތަކާއި ގަވާއިދުތަކުގެ އިމުން ބޭރުންކަމަށް ބައިނަލްއަޤްވާމީ މުޖުތަމައުން މީގެ ކުރިންވެސް ވަނީ ފާހަގަކޮށްފައެވެ. އިސްރާއީލުން ބޭނުންވަނީ ވެސްޓްބޭންކް އެމީހުންގެ ބާރުގެ ދަށަށް ގެނެސް އެތަނުގައި ދިރިއުޅެމުންދާ ފަލަސްތީނުގެ ރައްޔިތުންގެ ރަށްވެރިކަން އިސްރާއީލަށް ބަދަލުކުރުމަށެވެ.