އަމާޒަކީ ރަށްރަށުގެ މައްސަނދިކަން ދައްކުވައިދޭ ފަދަ މޮޑެލްއެއް ތަރައްގީކުރުން: ރައީސް
ރަށްރަށުގެ އިޤްތިޞާދު ކުރިއަރުވައި، ރާއްޖޭގެ ރަށްތަކުގެ މުއްސަނދިކަން ދައްކުވައިދޭ، އަދި ރައްޔިތުންނަށް އަމާޒުކުރެވިފައިވާ ދެމެހެއްޓެނިވި ފަތުރުވެރިކަމުގެ ނަމޫނާއެއް ޤާއިމުކުރުމަކީ އަމާޒެއް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދުނިޔޭގެ ފަތުރުވެރިކަމުގެ ދުވަހާ ގުޅިގެން "އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، ދިވެހިންގެ މެހެމާންދާރީގެ ރޫހަކީ މިއަދުވެސް ދުނިޔޭގެ އެކި ކަންކޮޅުތަކުން ރާއްޖެއަށް ޒިޔާރަތްކުރާ ފަތުރުވެރިން ތަޖުރިބާކުރަމުންދާ ކަމެއް ކަމަށެވެ.
ކުރިއެރުމާއި ދެމެހެއްޓެނިވި ތަރައްޤީ އެކުއެކީގައި ގެންދަންޖެހޭ ކަމަށާއި، ރަށްރަށުގެ އިޤްތިޞާދު ކުރިއަރުވައި، ރާއްޖޭގެ ރަށްތަކުގެ މުއްސަނދިކަން ދައްކުވައިދޭ، އަދި ރައްޔިތުންނަށް އަމާޒުކުރެވިފައިވާ ދެމެހެއްޓެނިވި ފަތުރުވެރިކަމުގެ ނަމޫނާއެއް ޤާއިމުކުރުމަކީ ސަރުކާރު އަމާޒުކަމަށް ރައީސް ވިދާޅުވިއެވެ.
ރައީސް އެފަދައިން ވިދާޅުވިއިރު، މިދިޔަ ފަސް އަހަރު ވެސް ދުނިޔޭގެ އެންމެ މަގުބޫލު މަންޒިލަކަށް ހޮވިފައިވަނީ ރާއްޖެއެވެ.
ކޮންމެ އަހަރެއްގެވެސް ސެޕްޓެމްބަރުމަހުގެ 27 ފާހަގަކުރަނީ ބައިނަލްއަޤްވާމީ ފަތުރުވެރިކމަުގެ ދުވަހުގެ ގޮތުގައެވެ. އެންމެފުރަތަމަ ރާއްޖެއަށް ފަތުރުވެރިކަން ތައާރަފްވެގެން އައީ 1972 ވަނަ އަހަރެވެ. ރާއްޖޭގެ ފަތުރުވެރިކަމަށް ބައި ޤަރުނުވެގެންދިޔައިރު، މިއަދު ރާއްޖެއަކީ ދުނިޔޭގެ ފަތުރުވެރިކަމުގެ ނަމޫނާ މަންޒިލެއްގެ ގޮތުގައި ބައިނަލްއަޤްވާމީ މުޖުތަމައުއިން ބަލައިގަންނަ ޤައުމެކެވެ.
Advertisement
This content is created and paid for by advertisers and does not involve Voice Journalists
