ގަލޮޅު ސަހަރާގެ މައްޔިތުން ވަޅުލުމަށް ކުރިން ބޭނުންކުރި ބިމެއްގައި ޝޯއެއް ބޭއްވުމުން ގިނަ ބައެއްގެ ނުރުހުން މާލެސިޓީ ކައުންސިލަށް އަމާޒުވެއްޖެއެވެ.

މާލެސިޓީ ކައުންސިލުން ވަނީ ގަލޮޅު ސަރަހާގެ ހުޅަނގު އުތުރު ފަރާތާއި ދެކުނު ފަރާތު ސަރަހައްދުގައި ހުރި މިނިކަށިތައް ނަގައި އެތަން ސާފްކޮށް އާއްމުކޮށް ބޭނުންކުރެވޭނޭހެން އެތަން ތައްޔާރުކޮށްފައެވެ. އެތަނުގެ ކައިރީ ފިހާރައަކުން ރޭ ވަނީ ސަހަރާއަށް ނިސްބަތްވާ އެ ބިމުގައި ބްރައިޑަލް ޝޯއެއް ކުރިއަށްގެންގޮސްފައެވެ. މިކަމާ ގުޅިގެން ބައެއް އާއްމު ފަރާތްތަކުން ވަނީ އެކަމާ ގުޅިގެން ކަންބޮޑުވުން ފާޅުކޮށްފައެވެ.

އެގޮތުން ބައެއް މީހުން ބުނެފައިވަނީ ގަބުރުތައް ނަގާ އުކާލައި އެތަނުގައި އެފަދަ ޝޯއެއް ބޭއްވުމަކީ ގަބުރުތަކަށާއި ، އާއިލާތަކަށް ވެވޭ ވަރަށްބޮޑު އިހާނެތިކަމެއްކަމަށް ފާހަގަކޮށްފައެވެ.

ގަލޮޅު ސަހަރާގައި ޝޯ ބޭއްވުުން ރައްޔިތެއްގެ ކަންބޮޑުވުން ފާޅުކޮށްފައި..

މިކަމާ ގުޅިގެން ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން، އެމަނިކްފާނުގެ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އެ ސަހަރާއަކީ ވަރަށް ގިނަ ޢިލްމުވެރިންނާއި އެހެންވެސް އެތައް ބޭފުޅުންނެއް ވަޅުފުޅުލެވިފައިވާ ތަނެއް ކަމަށެވެ. މިހާރު ގިނަ ޤަބުރުތަކެއް އެތަނުން ނެގި ނަމަވެސް މިފަދަ ޤަބުރުސްތާނެއްގައި ޝޯ ބާއްވާ ހެދުމަކީ ކޮށްގެންވާނެކަމެއްނޫންކަމަށް އޭނާ ފާހަގަކުރެއްވިއެވެ. އެއީ އެތާގައި ވަޅުލާފައިވާ މީހުންގެ ގާތްތިމާގެ މީހުނަށް ވަރަށް އަސަރާއި ހިތާމަހުރިކަމެއް ކަމަށްވެސް އޭނާ ވިދާޅުވިއެވެ.

ގަލޮޅު ސަހަރާގައި ޝޯ ބޭއްވުުން ކުރީގެ ޖަސްޓިސް މިނިސްޓަރު ކަންބޮޑުވުން ފާޅުކޮށްފައި..

ޝޯ ބޭއްވި ސަހަރާއަށް ނިސްބަތްވާ އެ ސަރަހައްދަކީ މާލެސިޓީ ކައުންސިލްގެ ބެލުމުގެ ދަށުގައި އޮންނަ ތަނެކެވެ. އެހެންކަމުން ވިޔަފާރީގެ އުސޫލުން އެތަނުގައި ކަންކަން ކުރެވޭނީ ސިޓީ ކައުންސިލުން އެކަމަށް ހުއްދަ ދިނުމުންނެވެ. މިކަމާ ގުޅިގެން ވޮއިސްއިން މާލެސިޓީ ކައުންސިލްގެ ބަހެއް ހޯދާލުމަށް މަސައްކަތްކުރި ނަމަވެސް އެފަރާތުގެ ބަހެއް ލިބޭގޮތް އަދި ވަނީ ނުވެފައެވެ.

މީގެ ކުރިން މާފަންނު ސަހަރާގެ ބައެއް ސަރަހައްދުން ގަބުރުތައް ނަގައި މާލެ ސިޓީ ކައުންސިލުން ވަނީ އެތަނުގައި ބައިބަލާ ކުޅޭ ތަނެއް ހަދާފައެވެ. އެ މައްސަލަ ފެންމަތިވި ނަމަވެސް އެފަހަރުވެސް މާލެސިޓީ ކައުންސިލުން އެކަމާ ހަވާލުވެފައެއް ނުވެއެވެ. އެފަހަރު އެ މައްސަލަ ފެންމަތިވުމުން މޭޔަރު އާދަމް އާޒިމް ވިދާޅުވެފައިވަނީ، ދީނީ ގޮތުން އެކަމަކީ ކޮށްގެން ނުވާކަމަކަށް ވަނީނަމަ، މާލެސިޓީ ކައުންސިލުން އަމަލުކުރާނީ ދީނީ އިލްމުވެރިންގެ ރަޢުޔުއާ އެއްގޮތަށްކަމަށެވެ.