ހުސްވި އޮގަސްޓްމަހު ދިވެހިން ހޯދާފައިވާ ބޭސްފަރުވާގެ އެކި ކަންކަމަށް އެންމެބޮޑު ހޭދައެއް ކުރަންޖެހުނީ ޓްރީޓޮޕް ހޮސްޕިޓަލަށްކަމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން ހާމަކޮށްފިއެވެ.

އެންސްޕާއިން ވަނީ ހުސްވި އޮގަސްޓްމަހު ދިވެހިންގެ ބޭސްފަރުވާގެ އެކި ކަންކަމަށް ކުރި ހޭދައަށް ހިނގި ހަރަދުތަކުގެ ތަފާސްހިސާބުތައް މިއަދު އާއްމުކޮށްފައެވެ. އެންސްޕާގެ ތަފާސްހިސާބުތަކަށް ބަލާއިރު، އޮަގަސްޓްމަހު ބެސްފަރުވާގެ އެކި ކަންކަމަށް ޖުމްލަ 16 މިލިއަނަށްވުރެ ގިނަ ރުފިޔާ ހޭދަވިއެވެ. މީގެ ތެރޭގައި ހިމެނެނީ ރާއްޖޭން ބޭރުން ފަރުވާ ކުރުމަށް ހިނގި 8.5 މިލިއަން ރުފިޔާ އާއި ރާއްޖޭގެ ސިއްހީ ހިދުމަތްދޭ އެކި ތަންތަނަށް ހޭދަވި 8.3 މިލިއަން ރުފިޔާއެވެ.

ރާއްޖޭގެ ސިއްހީ ހިދުމަތްދޭ މަރުކަޒުތަކުގެ ތެރެއިން އެނދުމަތިކޮށްގެން ހިނގި ހަރަދުތަކަށް އެންމެބޮޑު ހޭދައެއް ކުރަންޖެހުނީ ޓްރީޓޮޕް ހޮސްޕިޓަލަށެވެ. އޮަގސްޓްމަހު ޓްރީޓޮޕް ހޮސްޕިޓަލުން 359 މީހަކު ސިއްހީ ފަރުވާ ހޯދާފައިވާއިރު، އެއީ 4.8 މިލިއަން ރުފިޔާއެވެ. 

- ކަށީގެ ބަލިތަކަށް ހޯދި ފަރުވާއަށް: 1.09 މިލިއަން ރުފިޔާ

- ވިހެއުމާ ގުޅޭ: 753،131.12

- އަންހެނުންގެ ބަލިތައް: 575،881.62

- ކަރުންމަތި: 450،950.17

- މައިބަދަ: 346،138.06

އެންސްޕާއިން ދެވަނައަށް އެންމެބޮޑު ހޭދައެއްކުރީ އޭޑީކޭ ހޮސްޕިޓަލަށެވެ. އެ ހޮސްޕިޓަލުން 249 މީހަކު ފަރުވާ ހޯދިއިރު، އެ ހޮސްޕިޓަލަށް ކުރި ހޭދަ އުޅެނީ 3.8 މިލިއަން ރުފިޔާގައެވެ.

- މައިބަދަ/ނާރުގެ ބަލިތައް: 634،898.10

- ވިހެއުމާ ގުޅޭ: 514،731.28

- ކާޑިއޯވެސްކިއުލަރ: 514،186.84

- ކުޑަކަމުދާ ނިޒާމުގެ/ކިޑްނީބަލިތަކާ ގުޅޭ: 453،050.60

- ގޭސްތްރޯއިން: 307،650

އެންސްޕާއިން ބުނީ ބެސްފަރުވާގެ އެހީގެ ޕްރޮގްރާމް މެދުވެރިކޮށް އެހީ ހަމަޖައްސައިދިން އެސިސްޓިވް ޑިވައިސްތަކުގެ ޖުމްލަ އަގު 4.7 މިލިއަން ރުފިޔާއަށް އަރާކަމަށެވެ. މީގެ ތެރެއިން އެންމެ ބޮޑު ހަރަދެއް ހިނގާފައިވަނީ ބައިޕެޕް މެޝިންގެ އިތުރުން ހިއަރިން އެއިޑްފަދަ ތަކެއްޗަށެވެ.