ގެދޮރުވެރިޔާ ސްކީމްގެ ދަށުން ހުޅުމާލޭ ފޭސް ދޭއްގައި ފަހި ދިރިއުޅުން ކޯޕަރޭޝަނުން ތަރައްޤީކުރި 4،000 ހައުސިން ޔުނިޓްތައް ހައްޤުވެރިންނާ ހަވާލުކުރުމުގެ މަސައްކަތް މިއަދު ފަށައިފިއެވެ.

މިކަމާ ގުޅޭގޮތުން އެފްޑީސީން ބުނީ މިއަދު އެންމެ ފުރަތަމަ ހަވާލުކޮށްފައިވަނީ، ގެދޮރުވެރިޔާ ސްކީމްގެ އަމާން އުދަރެސް ޓަވަރު 14 އިން ޔުނިޓްތައް ލިބުނު ފަރާތްތަކަށް ކަމަށެވެ. މިކަމަށްޓަކައި މިއަދު އެ ޓަވަރުގައި ބޭއްވި ރަސްމިއްޔާތުގައި އެފްޑިސީގެ އިތުރުން ފިނޭންސް އެންޑް ޕެލޭނިން މިނިސްޓްރީއާއި، ޤައުމީ ކަރަންޓް ކުންފުނި، ފެންކުންފުނި، ހައުސިން މިނިސްޓްރީ އެޗްޑީސީ އަދި އެމްއެންޑީއެފްގެ ކަމާބެހޭ ބޭފުޅުން ބައިވެރިވެ ވަޑައިގެންނެވިއެވެ. 

ގެދޮރުވެރިޔާ ސްކީމްގައި ހިމެނޭ އެޕާޓްމަންޓްތައް ހަވާލުކުރަން ފެށުން..

އެފްޑީސީން ބުނީ ޓަވަރު 14 އިން ޔުނިޓްތައް ލިބުނު ފަރާތްތަކަށް ސަރުކާރު ބަންދުނޫން ކޮންމެ ދުވަހެއްގެ ހެނދުނު 9 އަކުން ހަވީރު ހަތަރެއް ޖެހުމާ ހަމަޔަށް ޔުނިޓްތައް ހަވާލުކުރަމުންދާނޭކަމަށެވެ. ފްލެޓްތަކަށް މީހުން ބަދަލުވާއިރު ޕޯޓަލް މެދުވެރިކޮށް ބޮޑެތި ތަކެއްޗާއި ފަރުނީޗަރުފަދަ ސާމާނު އެރުވުމުގެ އިންތިޒާމްތައް ހަމަޖެހިގެންދާނޭކަމަށް އެފްޑީސީން ބުނެއެވެ. މިގޮތުން މާދަމައިން ފެށިގެ ކުރިއަލާ ބުކިން ހެދުމުގެ ފުރުސަތު މިހާރު ވަނީ ހުޅުވާލާފައެވެ. އެފްޑީސީން ބުނީ އެޕާޓްމަންޓްތަކަށް ފަރުނީޗަރުފަދަ ތަކެތި ވެއްދުމުގެ އެ އިންތިޒާމްތައް ހަމަޖައްސާފައިވަނީ އިމާރާތުގެ ސަރަހައްދު ތޮއްޖެހުން ކުޑަކުރުމަށް ޓަކައިކަމަށެވެ. 

ގެދޮރުވެރިޔާ ސްކީމުގެ ދަށުން ތަރައްޤީކުރި 4،000 ހައުސިން ޔުނިޓް ހިމެނޭ ޓަވަރުތައް ތަރައްޤީކޮށްފައިވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައެވެ.