އިންޑިއާއާއި އެމެރިކާއާ ދެމެދު ވިޔަފާރީގެ އެއްބަސްވުމަށް އެކުލަވާލުމަށް ދެގައުމުން އަދިވެސް މަސައްކަތްކުރަމުން އެބަދެއެވެ.

އެމެރިކާގެ ރައީސްކަމަށް މިއަހަރު ކުރީކޮޅު ޑޮނަލްޑް ޓްރަމްޕް ދެވަނަ ދައުރަކަށް ހުވާކުރެއްވުމަށްފަހު، އެކި ޤައުމުތަކުން އެމެރިކާއަށް އެތެރެކުރާ މުދަލުން ބޮޑު ޓެރިފެއް ނެގުމުގެ މަސައްކަތް ފެއްޓެވިއެވެ. އަދި ޓެރިފް ކުޑަކުރެވެނީ ހަމައެކަނި އެމެރިކާއިން ބޭނުންވާ ޝަރުތުތަކާއެކު ވިޔަފާރީގެ އެއްބަސްވުން އެކުލަވާލާ ގައުމުތަކަށެވެ. އިންޑިއާއިންވެސް އެމެރިކާއާއެކު މަޝްވަރާކުރަމުންދަނިކޮށް، އަދި ވަރަށް އަވަހަށް ވިޔަފާރީގެ އެއްބަސްވުން އެކުލަވާލެވޭނެކަމުގެ އިޝާރާތެއް ދެގައުމުގެ ވެރިންވެސް ދީފައިވަނިކޮށް، އެމެރިކާއިން ވަނީ އިންޑިއާއިން އެގައުމަށް އެތެރެކުރާ މުދަލުން 50 އިންސައްތަ ޓެރިފެއް ނެގުމަށް ނިންމާފައެވެ.

އެމެރިކާގެ ހުއްޖަތަކަށް ދެއްކީ އިންޑިއާއިން ރަޝިޔާގެ ތެޔޮ ގަނެ، ރަޝިޔާ-ޔޫކްރެއިން ހަނގުރާމައިގައި ރަޝިޔާއަށް ނުސީދާގޮތުން ވާގިވެރިވަނީ ކަމަށެވެ. އެހެންނަމަވެސް އިންޑިއާގެ ދިފާޢަކީ އެގައުމަށް އަގު ހެޔޮކޮށް ތެޔޮ ގަންނަން ލބޭ ދިމާއަކުން އެގައުމުން ތެޔޮ ގަންނާނެ ކަމަށެވެ.

ޓެރިފް ބޮޑުކުރިނަމަވެސް އިންޑިއާއާއި އެމެރިކާގެ އޮފިޝަލުން ދަނީ އަދިވެސް މަޝްވަރާތައް ކުރައްވަމުންނެވެ. އެމެރިކާގެ ނިއުޔޯކުގައި ކުރިއަށްދާ އދގެ އާއްމު މަޖިލީހުގެ ބައްދަލުވުމަށް ވަޑައިގެންނެވި އިންޑިއާގެ އޮފިޝަލުން މި ހަފްތާގައިވެސް އެމެރިކާގެ އޮފިޝަލުންނާއެކު ދަނީ މަޝްވަރާކުރައްމުންނެވެ. އެގޮތުން އިންޑިއާގެ ކޮމަރސް އެންޑް އިންޑަސްޓްރީސް މިނިސްޓަރ ޕިޔުޝް ގޯޔާލް ވަނީ އެމެރިކާގެ ޓްރޭޑް ރެޕްރެޒެންޓޭޓިވް ޖޭމިސަން ގްރިއަރއާއި ބައްދަލުކުރައްވާފައެވެ. އަދި އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ. އެސް ޖައިޝަންކަރު ވަނީ އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި ބައްދަލުކުރައްވާފައެވެ.

އިންޑިއާގެ މިވަގުތުގެ އަމާޒަކީ އިންޑިއާއިން ނަގަމުން އަންނަ މުދަލުން ނަގާ 25 އިންސައްތަ ޓެރިފްގެ މައްޗަށް އިތުރުކުރި އަނެއް 25 އިންސައްތަ ކަނޑާލުމެވެ. އަދި އެއަށްފަހު ދެގައުމުގެ މެދުގައި ވިޔަފާރީގެ އެއްބަސްވުމެއް އެކުލަވާލެވުމެވެ.