ށ. ފޭދޫގެ ދެ ގެއެއް ބަލައި ފާސްކޮށް ޑްރަގާއި ފައިސާއާއެކު ދެ މީހަކު ހައްޔަރަށް
މި މަހުގެ 24 ވަނަ ދުވަހު ހިންގި ޚާއްސަ އޮޕަރޭޝަނެއްގައި ޑްރަގާއި ފައިސާއާއެކު ށ. ފޭދޫން ދެ މީހަކު ފުލުހުން ހައްޔަރުކޮށްފިއެވެ.
ފުލުހުން ބުނީ، އެ އޮޕަރޭޝަން އެދުވަހު ހިންގާފައިވަނީ ފުލުހުންނަށް ލިބުނު އިންޓެލިޖެންސްގެ ރިޕޯޓަކާ ގުޅިގެން ކަމަށެވެ. އަދި އެ އޮޕަރޭޝަނުގެ ތެރެއިން ކޯޓު އަމުރެއްގެ ދަށުން ފޭދޫގެ ގެއެއް ބަަލއި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި ދެ ކަރުދާސްކޮޅާއި އެކު ދެ މީހަކު ހައްޔަރުކޮށްފައިވާ ކަމަށް ފުލުހުން ބުންޏެވެ.
އެ ދެމީހުންނަކީ ށ. ފޭދޫ ސައިމާގެ މުޙައްމަދު މުސްތަފާ އާއި ހަމަ އެ ރަށު ލައިޓްފައުސް ފާތިމަތު ނައިލާއެވެ.
ފުލުހުން ބުނި ގޮތުގައި އެގެއިން މަސްތުވާތަކެތި ވިއްކައިގެން ހޯދައިފައިވާކަމަށް ބެލެވޭ ފައިސާ ވެސް ފެނިފައިވެއެވެ.
އެ މައްސަލައިގައި ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުސްތަފާ 15 ދުވަހަށް އަދި ނައިލާ ހަތް ދުވަހަށް ބަންދުކުރުމަށް އަމުރުކޮށްފައިވާއިރު، ނައިލާ އިތުރަށް ބަންދުގައި ބަހައްޓަން ނުފެންނާތީވެ މިހާރު ދޫކޮށްލައިފައިވާ ކަމަށް ވެސް ފުލުހުން ބުންޏެވެ.
އެ މައްސަލަ ފުލުހުން ގެންދަނީ ތަޙްޤީގުކުރަމުންނެވެ.
Advertisement
This content is created and paid for by advertisers and does not involve Voice Journalists
