2021 ވަނަ އަހަރުގެ ފެބްރުވަރީ މަހުގެ ތެރޭގައި ގއ.މާމެންދޫގައި ހިނގި ނުރައްކާތެރި ގްރޫޕް މާރާމާރީއެއްގައި މަރުވި، 17 އަހަރުގެ އަޙްމަދު އުދައްޔު މަރާލި ދެ މީހުންގެ މަރަން ކްރިމިނަލް ކޯޓުން އިއްޔެ ޙުކުމްކޮށްފިއެވެ.

8 ފެބްރުވަރީ 2021 ގައި މާމެންދޫގައި ހިނގި މި ޙާދިސާގައި އަނިޔާވި އުދައްޔު މަރުވެފައިވަނީ ގއ.ވިލިނގިލީ ހޮސްޕިޓަލްގައި ފަރުވާ ދިނުމަށްފަހު ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލުގައި ފަރުވާދެމުން ދަނިކޮށް އޭގެ އަނެއް ދުވަހުއެވެ.

އެ މައްސަލައިގައި ދެ މީހެއްގެ މައްޗަށް ވަނީ ގަސްދުގައި މީހަކު މެރުމުގައި ބައިވެރިވުމުގެ ކުށް ސާބިތުވެ މަރަން ހުކުމްކޮށްފައެވެ. އެމީހުންނަކީ މާމެންދޫ ރިހިފަރުދާގޭ އަހުމަދު ޝަމީމާއި އެރަށު ގުލްފާމްގޭ މުހައްމަދު މާޒިން އެވެ.

މި ދެމީހުން މަރަން ހުކުމްކުރީ މަރަށް މަރު ހިފުމަށް އުދައްޔުގެ ވާރިސުންކަމުގައިވާ އޭނާގެ މަންމަ އާއި ބައްޕަ ވެސް އެދިފައިވާތީއެވެ. އެގޮތުން އެނާގެ ބައްޕަ ވަނީ ޝަރީއަތުގައި ދެވެން އޮތް އެންމެ ބޮޑު ޙުކުމް ދިނުމަށް ޝަރީއަތުގައި އެދިފައެވެ. 

އުދައްޔުގެ މަރުގެ މައްސަލައިގައި އޭރު ދައުވާ އުފުލި ތިން މީހުން

އެ މައްސަލައިގައި ދެން ދައުވާ ލިބުނު އެ ރަށު ބިލަތްމާގޭ ޝަރަފް ރަޝީދުގެ މައްޗަށް ގަސްދުގައި މީހަކު މެރުމުގައި ބައިވެރިވުމުގެ ދައުވާކުރި ނަމަވެސް އެ ދައުވާ ސާބިތުނުވާ ކަމަށް ކޯޓުން ކުރިން އޮތީ ނިންމައިފައެވެ. އެހެން ނަމަޗެސް ތޫނު އެއްޗެއް ބޭނުންކޮށްގެން އެހެންމީހަކާ މެދު މާރާމާރީ ހިންގި މައްސަައިގައި އޭނާގެ މައްޗަށް ހަތް އަހަރުގެ ޖަލު ޙުކުމެއް ކޯޓުން ވަނީ އިއްވާފައެވެ.

އަދި އެ މައްސަލައިގައި އޭރު 17 އަހަރުގެ ކުއްޖެއްގެ މައްޗަށް ވެސް ޖުވެއިނަލު ކޯޓުގައި ވަނީ ދައުވާކޮށްފައެވެ. އޭނާ 25 އަހަރަށް ބަންދުގައި ބެހެއްޓުމަށް އޭރު ވަނީ ޙުކުމްކޮށްފައެވެ

އެ ޙާދިސާގައި އުދައްޔުގެ ބޭބެ ފިރުޝާން ޒާހިރު ވެސް ޒަޚަމުކޮށްފައިވެއެވެ. އެގޮތުން އޭނާގެ ބުރަކައްޓަށް ތޫނު އެއްޗަކުން ހަމަލާދީފައިވެއެވެ.