ބޭންކް އޮފް މޯލްޑިވްސްގެ ކްރެޑިޓް ކާޑަށް އަންނަ އަހަރުން ފެށިގެން ގެންނަ ބަދަލުތައް ރައީސް ޑރ.މުހައްމަދު މުއިއްޒު މިއަދު އިއުލާނުކުރައްވައިފިއެވެ.

އެކްސްގައި ކުރެއްވި ޕޯސްޓެއްގައި ރައީސް ޑރ.މުއިއްޒު ވަނީ 2026 ވަނަ އަހަރުގެ ފެބުރުއަރީމަހުގެ އެއްވަނަ ދުވަހުން ފެށިގެން ބީއެމްއެލް ކްރެޑިޓް ކާޑް ލިމިޓަށް ގެނައުމަށް ނިންމި ހެޔޮ ބަދަލުތައް ހިއްސާކުރައްވާފައެވެ. 

ރައީސްގެ ޕޯސްޓްގައި ވިދާޅުވީ ކްރެޑިޓް ކާޑް އިން މަހަކު ބޭނުންކުރެވޭ ޑޮލަރު ލިމިޓު ބޮޑު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، އަންނަ އަހަރުގެ ފެބުރުއަރީމަހުން ފެށިގެން ބީއެމްއެލް ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް، ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް އިތުރުވެގެން ދާނޭކަމަށެވެ. މީހެ އިތުރުން ޕްލެޓިނަމް ކާޑުގެ ލިމިޓް 1500 ޑޮލަރުން 2000 ޑޮލަރަށް ބޮޑު ކުރެވިގެންދާނޭކަމަށްވެސް ރައީސްގެ ޕޯސްޓްގައި ވިދާޅުވިއެވެ.

ރާއްޖެއަށް ދިމާވެފައިވާ ޑޮލަރުގެ މައްސަލަ ހައްލުކުރުމަށް ސަރުކާރުން ވަނީ ފިޔަވަޅުތަކެއް އަޅާފައެވެ. އެގޮތުން ޓޫރިޒަމް ވިޔަފާރިތަކުން ބޭންކްތަކަށް ވަކި އަދަދަކަށް ބޭރުފައިސާ މާރުކުރުން ލާޒިމްކޮށްފައިވާއިރު، ރައީސް ޑރ.މުއިއްޒު ވިދާޅުވެފައިވަނީ އެ ފިޔަވަޅުތަކުގެ ހެޔޮ ބަދަލުތައް މިއަހަރުގެ ފަހުކޮޅުން ފެށިގެން ރައްޔިތުންނަށް ފެންނަން ފަށާނޭކަމަށެވެ.

އެމްއެމްއޭއިން ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާ ގުޅިގެން ޓޫރިޒަމް ވިޔަފާރިކުރާ ކުންފުނިތަކުން މިހާރު، މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.