މޯލްޑިވް ގޭސް ޕްރައިވެޓް ލިމިޓެޑްގެ ގެ ކުރީގެ މެނޭޖިން ޑިރެކްޓަރ (އެމްޑީ) އަބްދުالله މަޢުމޫނުގެ މައްޗަށް ރިޝްވަތު ނެގިކަމުގެ ދެ ދައުވާއެއް ސާބިތުވެ 12 އަހަރާއި ނުވަ މަހާއި 18 ދުވަހަށް ޖަލަށްލާން ހުކުމްކޮށްފި އެވެ.

މޯލްޑިވް ގޭސްގެ އެމްޑީގެ މަގާމުގައި މައުމޫން ހުރި ދުވަސްވަރު އެކުންފުންޏަށް ބޭނުންވާ ކައްކާ ގޭސް (އެލްޕީޖީ) ބޭރުގެ ކުންފުންޏަކުން ހޯދުމުގެ މުޢާމަލާތުގެ ތެރޭގައި ރިޝްވަތުގެ ގޮތުގައި އެ ކުންފުނިން ޖުމްލަ 3,106,189.38 ނަގާފައިވާކަން ތަހްޤީޤަށް ސާބިތުވެ އޭނާގެ މައްޗަށް ހަތް ދައުވާއެއް އޮތީ އުފުލާފަ އެވެ.

އޭގެ ތެރެއިން ދެ ދައުވާއެއްގައި މިއަދު ވަނީ ހުކުމްކޮށްފަ އެވެ. އެ ދެ ދައުވާ ސާބިތުވާ ކަމަށް ކަނޑައަޅާ މައުމޫން, ޖަލަށްލާން ހުކުމްކުރީ 12 އަހަރާއި ނުވަ މަހާއި 18 ދުވަހަށެވެ.

އޭނާގެ މައްޗަށް އަދިވެސް ފަސް ދައުވާއެއް އެބަ އޮތެވެ. އެ ދައުވާތަކުގެ ހުކުމް އިއްވުން އޮތީ އެހެން ދުވަހަކަށް ފަސްކޮށްފަ އެވެ.

ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގެ ދަށުން އަބްދުالله މަޢުމޫނުގެ މައްޗަށް ދައުވާ ކޮށްދިނުމަށް އެދި ފޮނުވި ހަތް ދައުވާ އަކީ;

1. ދައުލަތުން ކުރާ ކަމަކާ ގުޅިގެން ރިޝްވަތު ހިފުމުގެ ކުށުގެ ދައުވާ

2. މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި ހޯދައިދިނުމުގެ ކުށުގެ ދައުވާ

3.  ދިވެހިރާއްޖޭގެ ޤާނޫނުލްޢުޤޫބާތުގެ ދަށުން ކުށެއް ކުރަން އުޅުމުގެ ކުށުގެ ދައުވާ

4.  ކުށެއް ކުރަން އެދުމުގެ ދައުވާ

5. ކުށެއް ކުރުމަށް ރޭވުމުގެ ދައުވާ

6. ރިޝްވަތު ގަބޫލުކުރުމުގެ ކުށުގެ ދައުވާ

7.  ރަސްމީ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން މަންފާ ހޯދުމާއި ހޯދައިދިނުމުގެ ކުށުގެ ދައުވާ