ރާއްޖޭގައި ހިނގަމުންދާ ކޮރަޕްޝަނާއި މަޤާމުގެ ނާޖައިޒު ފައިދާ ހޯދުމުގެ މައްސަލަތައް ބަލައި، އެކަންކަމާ މެދު އެޅޭނެ ފިޔަވަޅުތަކާއި ގުޅޭ ގޮތުން މަޝްވަރާކުރުމަށް ކުރީގެ ރައީސް މުޙައްމަދު ނަޝީދުގެ އިސްނެންގެވުމުގެ މަތިން ޚާއްސަ ކޮންފަރެންސެއް ބޭއްވުމަށް ނިންމައިފިއެވެ.

ރައީސް ނަޝީދު ރޭ "އެކްސް"ގައި ކުރެއްވި ޕޯސްޓެއްގައި އެމަނިކުފާނުގެ އޮފީހުގެ ބަޔާނެއް ވަނީ ނެރުއްވާފައެވެ. އެ ބަޔާނުގައި ވަނީ އެކި ސަރުކާރުތަކުގައި ނިޒާމީ ގޮތެއްގައި ހިނގާފައިވާ ކޮރަޕްޝަނާއި މަޤާމުގެ ނުފޫޒާއި ބާރު ނަހަމަ ގޮތުގައި ބޭނުންކުރުމުގެ މައްސަލަތައް ބަލައި ތަޙްލީލުކުރުމަށް ބާއްވާ އެ ކޮންފަރެންސްގައި ޤާނޫނީ ތަޖުރިބާކާރުންނާއި، މަދަނީ މުޖްތަމައިގެ ލީޑަރުންނާއި، ނޫސްވެރިންނާއި ބައިނަލްއަޤުވާމީ އޮބްޒާވަރުން ބައިވެރިވާނެކަން ހާމަކޮށްފައިވެއެވެ.

އަދި އެ ކޮންފަރެންސްގެ ހަރަކާތްތަކުގެ ތެރޭގައި މުއައްސަސާތަކާއި ސިޔާސީންގެ މެދުގައި ބިންވަޅު ނެގިފައިވާ ކޮރަޕްޝަނުގެ ޢަމަލުތަކުގެ މައްޗަށް ފުޅާދާއިރާއެއްގައި ނަޒަރު ހިންގައި، ބަލައި، ގަނޑަށް އެކަންކަން ތިރިކުރެވޭނެ ކަމަށް ވެސް އެ ބަޔާނުގައި ބުންޏެވެ. އަދި އެ އާދަކާދަ ބަދަލުކުރަން ބޭޏުންވާ ބައިނަލްއަގުވާމީ އަދި އެތެރޭގެ އެހީތަކާއި ހަރަކާތްތެރިކަމަށް ވެސް އެ ކޮންފަރެންސް މެދުވެރިކޮށް ކަންފަހި ކުރެވޭނެ ކަމަށް ވެސް އެ ބަޔާނުގައި ބުންޏެވެ.

އެ ބަޔާނުގައި ރައީސް ނަޝީދު ވިދާޅުވި ގޮތުގައި ކޮރަޕްޝަނަކީ ހަމައެކަނި ފައިސާތަކެއް ވަގަށް ނެގުމާ ގުޅޭ ކަމެއް ނޫނެވެ. އެގޮތުން އެ ވައްކަމުުގައި ދިވެހި ރައްޔިތުންގެ ކިބައިން ފޭރިގަނެވެނީ ފުރުސަތާއި އަބުރާއި އިއްޒަތާއި އަދި އިންސާފު ކަމަށް ވެސް އެމަނިކުފާނު ވިދާޅުވެފައިވެއެވެ.

އެ ބަޔާނުގައި ބުނި ގޮތުގައު އެ ކޮންފަރެންސްގައި ވިސިލްބްލޯވަރުންނާއި ކޮރަޕްޝަނުގެ ޝިކާރަކައަށް ވެފައިވާ ފަރާތްތަކުގެ ހެކިބަސް ނެގޭނެ ކަމަށް ވެސް އެ ބަޔާނުގައި ބުންޏެވެ.

އަދި އެ ކޮންފަރެންސްގައި އެމްއެމްއޭގެ ކުރީގެ ގަވަރުނަރު އަލީ ޙާޝީމް އާއި، އިކޮނޮމިކް ޑެވެލޮޕްމަންޓްގެ މިނިސްޓަރު މަޙްމޫދު ރާޒީ ބައިވެރިވެވަޑައިގަންނަވާނެ ކަމަށް ވެސް އެ ބަޔާނުގައި ބުންޏެވެ.

ރައީސް ނަޝިދު... ފޮޓޯ: ސޯޝަލް މީޑިއާ

އެހެން ނަމަވެސް އެ ކޮންފަރެންސް ބާއްވާނެ ތަނާއި ތާރީޚާއި އަދި އެޖެންޑާ ކުރިޔަށް އޮތް ހަފުތާތަކުގެ ތެރޭގައި ޢާންމު ކުރައްވާނެ ކަމަށް ވެސް އެ ބަޔާނުގައި ބުންޏެވެ.

ފާހަގަކުރެވޭ: ކޮރަޕްޝަނާއި ދެކޮޅަށް ކޮންފަރެންސެއް ކުރީގެ ކުރީގެ ރައީސް ނަޝީދު ބާއްވަވަން ނިންމަވައިފައިވާއިރު، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށް ސާބިތުވެ މިދިޔަ ސަރުކާރުގެ ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓާ އަހްމަދު ސައީދު މުހައްމަދު ހަތަރު އަހަރަށް ޖަލަށް ލުމަށް ކްރިމިނަލް ކޯޓުން މިދިޔަ އާދިއްތަ ދުވަހު ވަނީ ޙުކުމްކޮށްފައެވެ.

އެގޮތުން ސައީދުގެ މައްޗަށް ދައުވާކުރީ ބްލޭޒަން އިންކް ކިޔާ ކުންފުންޏަކާއެކު ފެނަކައިން ހެދި އެއްބަސްވުމެއްގެ މައްސަލައިގަ އެވެ. ދައުވާގައިވާ ގޮތުން އެ ކުންފުންޏާ ހަވާލުކުރި މަސައްކަތް އެކީ ނުނިންމަނީސް، އަދި މަސައްކަތް ފުރިހަމަކުރިކަން ކަށަވަރުނުކޮށް، އެ މަސައްކަތަށް ދޭންޖެހޭ ފައިސާ ފެނަކައިން ބްލޭޒަން އިންކަށް ދޫކޮށްފައިވާ ކަމަށެވެ. 

ފެނަކައިގެ އޭރުގެ އެމްޑީ އަހްމަދު ސައީދު

އެ މައްސަލައިގެ އިތުރަށް ވެސް  ސައީދަށް ތުހުމަތުވާ ކޮރަޕްޝަނުގެ ގިނަ މައްސަލަތަކެއް މިހާރު ވެސް އޭސީސީން ދަނީ ބަަލަމުންނެވެ. 

ސަޢީދުގެ އިތުރަށް މޯލްޑިވް ގޭސް ޕްރައިވެޓް ލިމިޓެޑްގެ ގެ ކުރީގެ މެނޭޖިން ޑިރެކްޓަރ (އެމްޑީ) އަބްދުالله މަޢުމޫނުގެ މައްޗަށް ރިޝްވަތު ނެގިކަމުގެ ދެ ދައުވާއެއް ސާބިތުވެ 12 އަހަރާއި ނުވަ މަހާއި 18 ދުވަހަށް ޖަލަށްލާން ވެސް އިއްޔެ ވަނީ ޙުކުމްކޮށްފައެވެ.

އެގޮތުން މައުމޫނުގެ މައްޗަށް ޙުކުމްކޮށްފައިވަނީ މޯލްޑިވް ގޭސްގެ އެމްޑީގެ މަގާމުގައި މައުމޫން ހުރި ދުވަސްވަރު އެކުންފުންޏަށް ބޭނުންވާ ކައްކާ ގޭސް (އެލްޕީޖީ) ބޭރުގެ ކުންފުންޏަކުން ހޯދުމުގެ މުޢާމަލާތުގެ ތެރޭގައި ރިޝްވަތުގެ ގޮތުގައި އެ ކުންފުނިން ޖުމްލަ 3,106,189.38 ނަގާފައިވާކަމަށް ބުނާ މައްސަލައެވެ.

އޭގެ ތެރެއިން ދެ ދައުވާއެއްގެ ޙުކުމް އިއްޔެ ކުރިއިރު،  އެ ދެ ދައުވާ ސާބިތުވާ ކަމަށް ކަނޑައަޅާ މައުމޫން, ޖަލަށްލާން ހުކުމްކުރީ 12 އަހަރާއި ނުވަ މަހާއި 18 ދުވަހަށެވެ.