ކޮރަޕްޝަނުގެ މައްސަލަތަކުގައި ތުހުމަތުތައް ކުރެވުނު ނަމަވެސް އެންޓި ކޮރަޕްޝަން ކޮމިޝަން ފަދަ މުއައްސަސާތަކުން ކުރި ތަހުގީގުތަކުން އެއްވެސް މައްސަލައެއް ފާހަގަކުރެވިނުވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރާއްޖޭގައި ހިނގަމުންދާ ކޮރަޕްޝަނާއި މަޤާމުގެ ނާޖައިޒު ފައިދާ ހޯދުމުގެ މައްސަލަތައް ބަލައި، އެކަންކަމާ މެދު އެޅޭނެ ފިޔަވަޅުތަކާއި ގުޅޭ ގޮތުން މަޝްވަރާކުރުމަށް އެމަނިކުފާނުގެ އިސްނެންގެވުމުގެ މަތިން ޚާއްސަ ކޮންފަރެންސެއް ބޭއްވުމަށް ނިންމަވާފައިކަން ހާމަކުރައްވަމަށްފަހު ކުރެއްވި ޕޯސްޓެއްގައެވެ.

އެގޮތުން އެ ޕޯސްޓުގައި ރައީސް ނަޝީދު ވިދާޅުވީ، އެމަނިކުފާނާއި ދެކޮޅަށް ވެސް ކޮރަޕްޝަނުގެ ތުހުތަމުތަކެއް ކުރެވުނު ކަމަށާއި، އެ ތުހުމަތުތަކާއި ގުޅިގެން އެ މުއާމަލާތްތައް އޮޑިޓުކުރެވި، އެންޓި ކޮރަޕްޝަން ކޮމިޝަނުން ތަހުގީގުކުރި މުޢާމަލާތްތަކުގައި އެއްވެސް މައްސަލައެއް ނެތް ކަމަށް ބަޔާންކޮށްފައިވާ ކަމަށެވެ.

އެހެން ނަމަވެސް ފެހި ޤާނޫނު އަސާާސީގެ ފަހުން އައި ހުރިހާ ސަރުކާރުތަކެއްގެ މުޢާމަލާތްތައް ބަލައި، ދިރާސާކުރުމަކީ މުހިންމުކަމެއް ކަމަށް ރައީސް ނަޝީދު ވިދާޅުވެފައިވެއެވެ.

ކޮރަޕްޝަނާއި މަޤާމުގެ ނާޖައިޒު ފައިދާ ހޯދުމުގެ މައްސަލަތައް ބަލައި، އެކަންކަމާ މެދު އެޅޭނެ ފިޔަވަޅުތަކާއި ގުޅޭ ގޮތުން މަޝްވަރާކުރުމަށް ކޮންފަރެންސެއް ބޭއްވުމަށް ނަޝީދު ނިންމަވައިފައިވާއިރު، އެ ކޮންފަރެންސްގައި ޤާނޫނީ ތަޖުރިބާކާރުންނާއި، މަދަނީ މުޖްތަމައިގެ ލީޑަރުންނާއި، ނޫސްވެރިންނާއި ބައިނަލްއަޤުވާމީ އޮބްޒާވަރުން ބައިވެރިވާނެކަމަށް ރައީސް ނަޝީދު ވިދާޅުވެފައިވެއެވެ.

އެގޮތުން އެ ކޮންފަރެންސް ބާއްވަނީ ސަރުކާރުތަކުގައި ނިޒާމީ ގޮތެއްގައި ހިނގާފައިވާ ކޮރަޕްޝަނާއި މަޤާމުގެ ނުފޫޒާއި ބާރު ނަހަމަ ގޮތުގައި ބޭނުންކުރުމުގެ މައްސަލަތައް ބަލައި ތަޙްލީލުކުރުމަށް ބާއްވާ ކޮންފަރެންސެއް ކަމަށް ވެސް އެ ޕޯސްޓުގައި ނަޝީދު ވިދާޅުވެފައިވެއެވ.