ޤުރުއާން ކިޔެވުމުގެ ޤައުމީ މުބާރާތުގެ ބައިތަކުން އެއްވަނަ ހޯދާ ފަރާތްތަކަށް، ތަޢުލީމް ޙާސިލްކުރަން ބޭނުން ދާއިރާއަކުން ޕީއެޗްޑީއާއި ހަމަޔަށް ބޭނުން ދާއިރާއަކުން ބޭނުން ޤައުމަކުން ކިޔެވުމުގެ ފުރުސަތު ދިނުމަށް ރައީސް ޑރ. މުޙައްމަދު މުޢިއްޒު ނިންމަވައިފިއެވެ.

"އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، ޤުރުއާން ކިޔެވުމުގެ ޤައުމީ މުބާރާތަކީ، ރާއްޖޭގައި ބާއްވާ އެންމެ އަގުބޮޑު އަދި އެންމެ ގިނަ އިނާމު ދެވޭ މުބާރާތް ކަމުގައި ހަދާނެކަމަށް މިދިޔަ އަހަރުގެ ޖަލްސާގައި އެމަނިކުފާނު އިއުލާނުކުރައްވައިފައިވާނެ ކަމަށެވެ.

އެއީ އެމަނިކުފާނު ވިދާޅުވި ގޮތުގައި،  އެންމެ ބޮޑު ހިތްވަރެއް ދޭންޖެހޭނީ، އެންމެ ބޮޑު އިނާމްތަކެއް ދެވެންވާނީ މާތް ﷲ ގެ މަތިވެރި ކަލާމްފުޅު އެންމެ ރީތިކޮށް ކިޔެވުމަށް ކަމަށް ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނު ފާހަގަކުރެއްވި ތިން ބައިން އެއްވަނަ ހޯދާ ފަރާތްތަކަށާއި، މުއައްސަސާތަކުގެ ބައިން މުޅި މުބާރާތުން އެއްވަނަ ހޯދާ ފަރާތްތަކަށް އޭގެ އިތުރަށް އެއްލައްކަ ރުފިޔާގެ ފައިސާގެ އިނާމަކާއި ޝަރަފުގެ ފިލައެއް ވެސް އެރުވޭނެ ކަމަށެވެ.

އަދި އެ މުބާރާތުގެ ހުރިހާ ވަނަތަކަށް އިސްލާމީ ވުޒާރާއިން ދޭ އިނާމުތައް މިހާރު ގިނަވެފައި ބޮޑުވާނެ ކަަމަށާއި، އަމިއްލަ ފަރާތްތަކުން އިނާމު ހުށަހަޅަން ދޭ ފުރުޞަތުވެސް އިތުރަށް ފަހިވާނެ ކަމަށް ރައީސް ވިދާޅުވިއެވެ.

މިދިޔަ އަހަރުގެ ކީރިތި ޤުރްއާން ކިޔެވުމުގެ ޤައުމީ މުބާރާތް ނިންމުމުގެ ޖަލްސާގައި ވާހަކަފުޅު ދައްކަވަމުން ރައީސް ވަނީ،  މި އަހަރުން އަހަރުން ފެށިގެން ޤައުމީ ޤުރުއާން މުބާރާތަކީ ރާއްޖޭގައި އެންމެ އަގުބޮޑު އަދި އެންމެ ގިނަ އިނާމުތައް ދޭ މުބާރާތް ކަމުގައި ހަދާނެ ކަމަށް ވިދާޅުވެފައެވެ.

އެގޮތުން އެދުވަހު ރައީސް ވިދާޅުވީ، މި ސަރުކާރުން ކީރިތި ޤުރްއާނުގެ ޢިލްމާއި ކިޔެވުމުގެ ފަންނު ކުރިއެރުވުމަށް އަވަސް ފިޔަވަޅުތަކެއް އަޅަމުންދާކަމަށެވެ. އެގޮތުން ކުރިއަށް އޮތްތަނުގައި ކުރަން ގަސްތުކުރައްވާފައިވާ ބައެއް ކަންކަން އެދުވަހު ޙިއްސާ ކުރައްވާފައެވެ. މީގެ ތެރޭގައި:

1. "ދާރުއްސަލާމް" އަދި "ދާރުލްއަރްޤަމް" ނަމުގައި އާ ވަޤުފު އިމާރާތްތަކެއް އެޅުން.

2. ހިލޭ ކީރިތި ޤުރްއާން ކިޔެވޭނެ ކިލާސްތައް އިތުރުކޮށް، މުޅި ރާއްޖެއަށް މި ޚިދުމަތް ފުޅާކުރުން.

3. ކީރިތި ޤުރްއާން ހިތުދަސް ހާފިޒުންނަށް ލިބޭ އިނާޔަތް ދެ ގުނަޔަށް ބޮޑުކުރުން.

4. ކީރިތި ޤުރްއާނާ ބެހޭ މަރުކަޒެއް އަލުން އިމާރާތްކުރުން.

މީގެ އިތުރުން، ޒަމާނީ ޓެކްނޯލޮޖީގެ އެހީގައި ތައްޔާރުކޮށް އާންމުކުރެވޭ ކީރިތި ޤުރްއާނާ ބެހޭ ޚާއްޞަ ދާއިމީ މައުރަޒެއް ރާއްޖޭގައި ޤާއިމުކުރުމަށް ގަސްތުކުރައްވާ ކަމަށް ވެސް އެ ދުވަހު ރައީސް ވިދާޅުވެފައިވެއެވެ..