ޗައިނާއިން ނެގި ދަރަނިތައް ދެއްކުމުގައި ރާއްޖެއަށް ލުއި ގޮތްތަކެއް ހަމަޖައްސައިދީފި
އެކިއެކި މަޝްރޫޢުތައް ކުރިއަށްގެންދިއުމަށް ޗައިނާއިން ނެގި ދަރަނިތައް އަދާކުރުމުގައި ރާއްޖެއަށް ލުއި ގޮތްތަކެއް ހަމަޖައްސައިދީފިކަމަށް ޗައިނާއިން ހާމަކޮށްފިއެވެ.
ޗައިނާގެ 76 ވަނަ ޤައުމީ ދުވަހާއި މިޑް އޯޓަމް ފެސްޓިވަލް ފާހަގަކުރުމަށް ބޭއްވި ޖާފަތުގައި ވާހަކަދައްކަވަމުން ރާއްޖޭގައި ހުންނަވާ ޗައިނާ ސަފީރު ކޮންގް ޝިންހުއާ ވަނީ އެޤައުމުން ރާއްޖެއާމެދު ދެކެމުން އަންނަ ގޮތް ވަރަށް ސާފުކޮށް ބަޔާންކޮށްދެއްވާފައެވެ. ސަފީރު ކޮންގް ޝިންހުއާ ވިދާޅުވީ ރާއްޖެއާ ޗައިނާ އާ ދެމެދު ސިޔާސީގުޅުން ގާއިމްކުރިތާ ބައިގަރުނަށްވުރެ ގިނަ ދުވަސް ވެގެންދިޔައިރު، ދެޤައުމުގެ އޮތީ ވަރަށް ބަދަހި ނަމޫނާ ގުޅުމެއް ކަމަށެވެ.
ސަފީރު ވިދާޅުވީ ޗައިނާއިން ރާއްޖެއަށް މާލީ ކަންކަމުގައި އެހީތެރިކަން ދެނީ އެކަމުގެ ސަބަބުން ރާއްޖޭގެ މިނިވަންކަމާއި ޤައުމުގެ ސިޔާދަތަށް ބުރޫ ނާރާނެހެން ހެޔޮއެދޭ ހަގީގީ މާނައިގައިކަމަށެވެ. ސަފީރު ވިދާޅުވީ ރާއްޖެއިން ޗައިނާއަށް ދަރާފައިވާ ދަރަނިތައް އަދާކުރުމުގައި ލުއިގޮތްތަކެއް ހަމަޖެހިގެން ގޮސްފައިވާކަމަށެވެ. އެކަމުގައި ދެ ޤައުމުން ކުރެވިގެންދިޔަ މަޝްވަރާތައް ކާމިޔާބުކަން ފާހަގަކުރައްވަމުން ސަފީރު ވަނީ ރައީސް ޑރ.މުހައްމަދު މުއިއްޒުގެ ސަރުކާރުން ގެންގުޅުއްވާ މާލީ ސިޔާސަތުތަކަށް ފުރިހަމަޔަށް އިހްތިރާމްކުރާކަން ފާހަގަކުރައްވާފައެވެ.
ޗައިނާ ސަފީރު ވަނީ މީގެ ކުރިންވެސް ދަރަނީގެ މައްސަލަ އާއި ރާއްޖޭގެ އިގްތިސާދީ ހާލަތާ ގުޅޭގޮތުން އެޤައުމުގެ ރަޢުޔު ހާމަކުރައްވާފައެވެ. ރާއްޖެއިން ބޭނުންވާ ކަންކަމުގައި ޗައިނާއިން އެހީވުމަށް ތައްޔާރަށް އޮންނާނޭކަމަށް ސަފީރު ވަނީ މީގެކުރިން ތަކުރާރުކޮށް ވިދާޅުވެފައެވެ. އެގޮތުން ރާއްޖެއަށް ބޭނުންވާ މާލީ ކަންކަމާއި އެނޫންވެސް ތަރައްޤީގެ އެކިއެކި ކަންކަމުގައި ޗައިނާއިން އެހީވާނޭކަމުގެ ޔަގީންގަން ސަފީރު ވަނީ ދެއްވާފައެވެ.
ސަފީރު ޝީންހުއާ ވިދާޅުވެފައިވަނީ ރާއްޖެއަށް ކުރިމަތިވެފައިވާ މާލީ ހާލަތުން އަރައިގަތުމުގެ ގާބިލިއްޔަތުކަން ސަރުކާރުގެ ހުރިކަން ފާހަގަކުރައްވައި ދިވެހި ރައްޔިތުންވެސް ސަރުކާރަށް އިތުބާރުކުރުމަށް އެދިވަޑައިގެންފައެވެ
Advertisement
This content is created and paid for by advertisers and does not involve Voice Journalists
