އައްޑޫސިޓީގެ ހަންކެޑެގައި ފަތުރުވެރިކަމުގެ އާ މަޝްރޫއެއް ހިންގެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ނިންމަވައިފި އެވެ.
ސަރުކާރުން މިރޭ ބުނީ މި ނިންމެވުމާއެކު، އައްޑޫސިޓީގެ ހަންކެޑެ ފަތުރުވެރިކަމުގެ ބޭނުމަށް ތަރައްގީ ކުރުމުގެ މަސައްކަތް އަވަސް ކުރުމުގެ މަގްސަދުގައި، ސަރުކާރުގެ ޓޫރިޒަމް ރިއަލް އެސްޓޭޓް ޑިވެލޮޕްމަންޓް ޕްރޮޖެކްޓެއް ހިންގާ ސަރަހައްދެއްގެ ގޮތުގައި ކަނޑައަޅައި، އައްޑޫސިޓީގެ ހަންކެޑެ މޯލްޑިވްސް ފަންޑް މެނޭޖްމަންޓް ކޯޕަރޭޝަނަށް ކުއްޔަށް ދިނުމަށް ޑިސެންބަރު, 2 2021 ގައި އެކަށައެޅުއްވި ރައީސުލްޖުމްހޫރިއްޔާގެ ގަރާރު، މިއަދު ނެރުއްވާފައިވާ ގަރާރުން ވަނީ އުވައިލައްވާފައި ކަަމަށެވެ.
ރައީސުލްޖުމްހޫރިއްޔާގެ މި ނިންމެވުމާއެކު ފަތުރުވެރިކަމުގެ އާ މަޝްރޫއެއް ހިންގުމަށް އެ ރަށް މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓާ ވަނީ ހަވާލުކުރައްވައިފަ އެވެ.
އައްޑޫގައި ޓޫރިޒަމް ތަރައްޤީކުރުމަކީ ރައީސް މުޢިއްޒުގެ ވައުދުފުޅެކެވެ. އެގޮތުން މިހާރު ބަންދުކޮށްފައިވާ ޝަންގްރިލާ މޯލްޑިވްސް ރިސޯޓް އަލުން ހުޅުވުމާއި ހަންކެޑެ ތަރައްގީ ކުރުން ހިމެނެ އެވެ. ޝަންގްރިލާ މޯލްޑިވްސް ރިސޯޓް މި އަަހަރުގެ ފަހު ދުވަހުގެ ކުރީން ހުޅުވަން މިހާރު ވަނީ ނިންމާފަ އެވެ.
Advertisement
This content is created and paid for by advertisers and does not involve Voice Journalists
