ގްލޯބަލް ސުމޫދު ފްލޮޓިއްލާގެ 13 ބޯޓެއް ހިސާރުކޮށް، އޭގެން ދަތުރުކުރި 162 މެންބަރަކު އިޒްރޭލުން ހައްޔަރުކޮށްފިއެވެ.
ގްލޯބަލް ސުމޫދު ފްލޮޓިއްލާގައި ރާއްޖޭގެ ފަރާތުން އިސްކޮށް ހަރަކާތްތެރިވަމުންދާ އިންޓަނޭޝަނަލް އެއިޑް ކެމްޕެއިން (އައިއޭސީ)ގެ ޕަބްލިކް ރިލޭޝަންސް މެނޭޖަރި އަޒްހަދު އަޙްމަދު ވިދާޅުވީ، ރޭ ނިރުބަވެރިން ސުމޫދް ފްލޮޓިއްލާގެ 13 ބޯޓެއް ޙިސާރުކޮށްފައިވާ ކަމަށެވެ.
އެގޮތުން އެ ބޯޓުތައް ޙިސާރުކުރުމުގެ ކުރިން، އެބޯޓުތައް ވަށައި ދުއްވައި، ސިގްނަލުތައް ޖޭމުކޮށް، ކަނެކްޝަންތައް ކަނޑައި އެ ބޯޓުތައް އަމާޒުކޮށް ފެން ވެސް ޖަހައިފައިވާ ކަމަށް ވެސް އަޒްހަދު ވިދާޅުވިއެވެ.
އަޒްހަދު ވިދާޅުވި ގޮތުގައި އެ ބޯޓުތަކުން ހައްޔަރުކުރި 162 މެންބަރުންގެ ތެރޭގައި 25 ޤައުމެއްގެ ރައްޔިތުން ހިމެނެއެވެ.
މުޅި ޖުމްލަ 44 ބޯޓު ހިމެނޭ އެ ފްލީޓުން 13 ބޯޓު ހައްޔަރުކުރި ނަމަވެސް، މިވަގުތު ވެސް ބާކީ އޮތް 30 ބޯޓެއް ޣައްޒާއަށް މިސްރާބުޖަހަމުންދާކަމަށް ވެސް އަޒްހަދު ވިދާޅުވިއެވެ. އަދި އެއްވެސް ހުރަހެއް ނެތި އެ ބޯޓުތަކަށް ދަތުރުކުރެވިއްޖެނަމަ ކުރިޔަށް އޮތް ފަސް ގަޑިއިރުގެ ތެރޭގައި އެ ބޯޓުތައް ޣައްޒާގެ އަތިރިމައްޗަށް ކައިރިކުރާނެ ކަމަށް ވެސް އަޒްހަދު ވިދާޅުވިއެވެ.
ފާހަގަކުރެވޭ ގޮތުގައި ގްލޯބަލް ސުމޫދު ފްލޮޓިއްލާގައި އައިއޭސީގެ ފަރާތުން ދަނީ ޢަމަލީ ގޮތުން ވެސް ހަރަކާތްތެރިވަމުންނެވެ. އެގޮތުން އައިއޭސީގެ ސެކްރެޓަރީ ޖެނެރަލް އަޙްމަދު ޝާޒު (ބޮޑޭ) ވަނީ އެ ފްލޮޓިއްލާގެ އޮބްޒާވަރުންގެ ބޯޓުގައި ފްލީޓާއެކު ދަތުރުކޮށްފައެވެ. އެހެން ނަމަވެސް އެ ބޯޓުތަކަށް އިޒްރޭލުގެ ނިރުބަވެރި ސިފައިން އަރާނެކަން ޔަގީންވުމުން ޝާޒް ހިމެނޭ އޮބްޒާވަރުންގެ ޓީމު ވަނީ ސައިޕްރަސްއާ ދިމާލަށް މިސްރާބު ޖަހައިފައެވެ.
މި ފަހަރު ވެސް އެ ބޯޓުތައް ހިސާރުކޮށްފައިވަނީ ޣައްޒާ އާއި ގާތްގަޑަކށް 70 ނޯޓިކަލް މޭލު ބޭރުން، އިޒްރޭލުގެ ބާރު ނުހިނގާ ސަރަޙައްދަކުންނެވެ. އެހެންކަމުން އެކަމަކީ ބައިނަލްއަގުވާމީ ޤާނޫނުތަކާއި މުޅިން ޚިލާފު ކަމެކެވެ.
ގްލޯބަލް ސުމޫދު ފްލޮޓިލާ ޣައްޒާއަށް ދަތުރުކުރަނީ އިޒްރޭލުން ޣައްޒާގެ މައްޗަށް އަޅާފައިވާ ބްލޮކޭޑަށް ގޮންޖެހުމުގެ ގޮތުންނެވެ. މީގެ ކުރިންވެސް ޣައްޒާއަށް ދަތުރުކުރި ފްލޮޓިލާތައް މެޑިޓަރޭނިއަން ކަނޑުގެ މިފަދަ ސަރަހައްދުތަކުގައި އިސްރާއީލުން ވަނީ ހުއްޓުވާފައެވެ.
Advertisement
This content is created and paid for by advertisers and does not involve Voice Journalists
