ގްލޯބަލް ސުމޫދު ފްލޮޓިއްލާގެ 21 ބޯޓެއް އިޒްރޭލުގެ ޔަހޫދީ ނިރުބަވެރި ސިފައިން ހިސޯރުކޮށްފިއެވެ. 

ސުމޫދް ފްލޮޓިއްލާގެ ޓެރްކާއިން ދައްކާ ގޮތުން، ރޭ އިޒްރޭލުން ހިސޯރުކުރި 13 ބޯޓުގެ އިތުރަށް މިހާރު ވަނީ އަށް ބޯޓެއް ހިސޯރުކޮށްފައެވެ. އަދި އޭގެ އިތުރު 10 ބޯޓު ހިސޯރުކޮށްފައިވާ ކަމަށް ބެލެވޭ ކަމަށް ވެސް އެ ޓްރެކާއިން ދައްކައެވެ.

މުޅި ޖުމްލަ 44 ބޯޓު ހިމެނޭ އެ ފްލީޓުން މުޅި ޖުމްލަ 31 ބޯޓު އިޒްރޭލުން ހިސޯރުކޮށްފައިވާކަމަށް ބެލެވުނު ނަމަވެސް، ބާކީ އޮތް 13 ބޯޓު ޣައްޒާއަށް ދަނީ މިސްރާބުޖަހަމުންނެވެ. އެ ބޯޓުތަކުގެ ތެރެއިން ގެ މިކޭނޯގެ ބޯޓު ޣައްޒާގެ ކަނޑުގެ ސަރަޙައްދުތަކަށް މިހާރު ވަނީ ވަދެފައެވެ.

އެ ބޯޓުުތައް ހިސޯރުކޮށް، އޭގެން ދަތުރުކުރާ މީހުން ހައްޔަރުކުރަން އިޒްރޭލުން ފަށައިފައިވަނީ އެ ބޯޓުތައް ޣައްޒާއާއި ގާތްގަޑަކަށް 70 ނޯޓިކަލް މޭލު ކައިރިވުމުންނެވެ. އެ ބޯޓުތައް އިޒްރޭލުން ހިސޯރުކޮށްފައިވަނީ އިޒްރޭލުގެ ބާރު ނުހިނގާ ސަރަޙައްދަކުންނެވެ. އެހެންކަމުން އެކަމަކީ ބައިނަލްއަގުވާމީ ޤާނޫނުތަކާއި މުޅިން ޚިލާފު ކަމެކެވެ.

ގްލޯބަލް ސުމޫދު ފްލޮޓިލާ ޣައްޒާއަށް ދަތުރުކުރަނީ އިޒްރޭލުން ޣައްޒާގެ މައްޗަށް އަޅާފައިވާ ބްލޮކޭޑަށް ގޮންޖެހުމުގެ ގޮތުންނެވެ. މީގެ ކުރިންވެސް ޣައްޒާއަށް ދަތުރުކުރި ފްލޮޓިލާތައް މެޑިޓަރޭނިއަން ކަނޑުގެ މިފަދަ ސަރަހައްދުތަކުގައި އިސްރާއީލުން ވަނީ ހުއްޓުވާފައެވެ. 

މި މުޅި ހަރަކާތުގައި 44 ޤައުމަކުން ގާތްގަޑަކަށް 500 އެއްހާ މީހުން ބައިވެރިވެއެވެ. އޭގެ ތެރޭގައި  އައިއޭސީގެ ސެކްރެޓަރީ ޖެނެރަލް އަޙްމަދު ޝާޒު (ބޮޑޭ) ވަނީ އެ ފްލޮޓިއްލާގެ އޮބްޒާވަރުންގެ ބޯޓުގައި ފްލީޓާއެކު ދަތުރުކޮށްފައެވެ. ބެލެވޭ ގޮތުގައި ޝާޒް ހުރި ބޯޓު މިހާރު ވަނީ ސައިޕްރަސްއަށް ދިޔުމަށް މިސްރާބުޖަހައިފައެވެ.