އޮޑިޓަރ ޖެނެރަލްގެ އޮފީހުން ނެރުނު ފެނަކަ ކޯޕަރޭޝަނުގެ އޮޑިޓް ރިޕޯޓަކީ ދަންވަރުގަޑީގައި އޮފީސް ހުޅުވައިގެން ނެރުނު ސިޔާސީ ރިޕޯޓެއްކަމަށް ކުރީގެ ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެއެވެ.

ރާއްޖެޓީވީގައި ފެނަކަ އޮޑިޓް ރިޕޯޓާ ގުޅޭގޮތުން ވާހަކަދައްކަވަމުން ރައީސް ސޯލިހް ވަނީ އެމަނިކްފާނުގެ ވެރިކަމުގައި މިނިވަން މުއައްސަސާތައް މިނިވަންކަމާއެކު ހިންގެވުމަށް ގިނަ މަސައްކަތްތަކެއް ކުރައްވައި ވަރަށް ރަނގަޅު މިސްރާބަކަށް ގެންދެވުނުކަން ފާހަގަކުރައްވާފައެވެ. އެގޮތުން އޮޑިޓް އޮފީހުގެ މަސައްކަތްތައް ކުރިއަށްގެންދިއުމުގައި އިމާވެފައިވާ ގޮންޖެހުންތައް ބަލައި، އޮޑިޓް އޮފީހުގެ އިމާރާތް އެޅުމަށް ބިމާއި، އަދި ތަނުގެ އިންސާނީ ވަސީލަތްތައް ތަރައްޤީކުރުމުގެ އިތުރުން ބަޖެޓްވެސް ބޮޑުކޮށްދީފައިވާނޭކަމަށް ރައީސް ސޯލިހް ވިދާޅުވިއެވެ.

ރައީސް ސޯލިހް ވިދާޅުވީ އެމްޑީޕީގެ ވެރިކަމުގައި މިނިވަން މުއައްސަސާތަކަށް ހޯދައިދިން މިނިވަންކަން އަދުގެ ސަރުކާރުން ނިގުޅައިގަނެފައިވާކަމަށެވެ. އެގޮތުން މިއަދު ސަރުކާރުން މިނިވަން މުއައްސަސާތައް ބޭނުންކުރަނީ ކަންބަޅިބަކަރި ގުރުބާންކުރާ އުސޫލުންކަން ރައީސް ސޯލިހްގެ ވާހަކަފުޅުގައި ފާހަގަކުރެއްވިއެވެ.

ރައީސް ސޯލިހް ވިދާޅުވީ ނިމިގެންދިޔަ އެމްޑީޕީގެ ވެރިކަމުގައި އެމަނިކްފާނަށް ޖަވާބުދާރީވެ ވަޑައިނުގެންނެވޭނޭ އެއްވެސްކަމެއް ހިންގާފައި ނުވާނޭކަމަށެވެ. 

ފެނަކަ އޮޑިޓް ރިޕޯތަކީ ވަރަށްބޮޑަށް ސިޔާސީ މަގްސަދެއްގައި އަދި ކަމުގެ މައުލޫމާތު ރައްޔިތުންނަށް ވަރަށްބޮޑަށް އޮޅޭގޮތަށް ނެރެފައިވާ ރިޕޯޓެއްކަން ފާހަގަކުރައްވަމުން ރައީސް ސޯލިހް ވިދާޅުވީ، އެމްއެމްޕީއާރުސީގެ ހިޔާނާތާއި، އޮޑިޓް ރިޕޯޓްގައި ފާހަގަކޮށްފައިވާ ފެނަކައިގެ ކަންކަން އަޅައި ނުކިޔޭނޭކަމަށެވެ. އެގޮތުން އެމްއެމްޕީއާރުސީގެ ހިޔާނާތަކީ ވަރަށް ފުޅާދާއިރާއެއްގައި ކޮށްފައި އޮތްކަމެއް ކަމަށެވެ. އެގޮތުން އެމްއެމްޕީއާރުސީގެ ހިޔާނާތުގައި ނުއަގުގައި ފަޅުރަށްތައް ވިއްކައި އެއިން ލިބުނު މަންފާ އަމިއްލައަށް ބޭނުންކޮށްފައިވާކަމަށް ރައީސް ވިދާޅުވިއެވެ.

ރައީސް ސޯލިހް ވިދާޅުވީ ސިޔާސީ މަގްސަދެއްގައި ފެނަކައިގެ އޮޑިޓް ރިޕޯޓް ނެރުމުގެ ނަތީޖާއަކީ އެތައްބައެއްގެ އަބުރުކަތިލެވިގެން ދިއުންކަމަށާއި ހިޔާނާތެއް ވެފައި އޮތްނަމަ އެކަން ބަލަންވީކަމަށެވެ. އެގޮތުން ޖަާބުދާރީވާން ނުދެވޭނެ އެއްވެސް މުއައްސަސާއެއް ނޯންނާނޭކަމަށް ރައީސް ސޯލިހް ވަނީ ވަރަށް ޔަގީންކަމާއެކު ވިދާޅުވެފައެވެ.

އޮޑިޓަރ ޖެނެރަލް މިދިޔަ މަހުގެ 26 ވަނަ ދުވަހުގެ ރޭ ނެރުއްވި ފެނަކައިގެ 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ހިންގާފައިވާ މާލީ މުއާމަލާތްތަކާއި ގުޅޭ ތަފްސީލް ރިޕޯޓްގައި ވާގޮތުން ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ އެއްބަސްވުން ހަދާފައިވާކަމަށް ވަނީ ފާހަގަކޮށްފައެވެ.

އޮޑިޓް ރިޕޯޓްގައިވާ ގޮތުން މި މުއްދަތުގައި 2.2 ރުފިޔާގެ އެއްބަސްވުން ފެނަކައިން ހަދާފައިވެ އެވެ. އޭގެ ތެރެއިން 1.3 ބިލިއަން ރުފިޔާގެ މުދަލާއި ހިދުމަތް ހޯދުމަށް ހަވާލުކޮށްފައި ވަނީ އާންމު ބީލަމުގެ އުސޫލުން ބޭރުން ކަމަށް ވަނީ ބުނެފަ އެވެ.

މި އެއްބަސްވުންތައް ހެދީ ދެތިން ފަރާތަކުން އަގު ހޯދައިގެން ކަމަށް ވެސް ވަނީ ބުނެފަ އެވެ.

އޮޑިޓްގައިވާ ގޮތުން އާންމު ބީލަމުގެ އުސޫލުން ބޭރުން ހޯދާފައިވާ މުދަލާއި ހިދުމަތްތަކަށް ބަލާއިރު 439 އެއްބަސްވުމެއްގެ ދަށުން ހޯދި މުދަލާއި ހިދުމަތް ހިމެނެ އެވެ. އެއީ ކަރަންޓް ކޭބަލް ގަތުމާއި ޖަނަރޭޓަރު ސެޓްތައް ގަތުމާއި ޓްރާސްފޯމަރު ގަތުމާއި ފެނާއި ނަރުދަމާގެ މަޝްރޫއުތަކުގެ އެކި މަސައްކަތްތައް ހެދި އެއްބަސްވުން ކަމަށް ވަނީ ބުނެފަ އެވެ.