ދިވެހި ކުންފުނިތަކަށް ދޭންޖެހޭ ހުރިހާ ފައިސާއެއް ކުރިއަށް އޮތް ފަސްހަފްތާތެރޭ ދީ ނިންމާނެ: ރައީސް
ދިވެހި ވިޔަފާރިތައް މެދުވެރިކޮށް ކުރުވާ ފައިސާނުދީ ހުރި މައްސަލަތައް ހައްލުކޮށް ދެއްވާނެ ކަމުގެ ޔަގީންކަން ދެއްވާ އެކަން ކޮށް ނިންމަވާނެ ތާރީހެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ އިއުލާނު ކުރައްވައިފި އެވެ.
ރައީސް އެކަން އިއުލާނު ކުރެއްވީ އެކްސްގައި ދެންމެ ކުރެއްވި ޕޯސްޓެއްގަ އެވެ.
ރައީސް ވިދާޅުވީ 17 ނޮވެމްބަރު 2023 ގައި ސަރުކާރު ހިންގުމާ އެމަނިކުފާނު ހަވާލުވެވަޑައިގެންނެވިއިރު ދިވެހި ވިޔަފާރިތައް މެދުވެރިކޮށް ކުރުވާ ފައިސާނުދީ ހުރި އެތައްހާސް ބިލުތައް ހިމެނޭހެން، ދިވެހި ސަރުކާރަށާއި ސަރުކާރު ހިއްސާވާ ކުންފުނިތަކަށް، ގާނޫނުތަކާއި ގަވާއިދުތަކުގައި ކަނޑައަޅާފައިވާ އުސޫލުތަކާ އެއްގޮތްވާ ގޮތުގެ މަތީން ހުށަހަޅާފައިވާ އެންމެހައި ބިލުތަކަށް އަދާކުރަންޖެހޭ ފައިސާ، ކުރިޔަށް އޮތް ފަސް ހަފްތާ ތެރޭ ދައްކާ ނިމޭނެ ކަމަށެވެ.
އެމަނިކުފާނު ވިދާޅުވި ގޮތުގައި ފުން އަނދަވަޅެއްގައި އޭރު އޮތް ދިވެހި އިގްތިސާދު ނަގާ ކޮޅަށް ޖެހުމުގައި ކުރެވެމުންދާ މަސަައްކަތުގެ ތެރެއިން މީ ހާސިލްކުރެވޭ ވަރަށް ބޮޑު ކާމިޔާބިއެކެވެ.
ދިވެހި ވިޔަފާރިތައް މެދުވެރިކޮށް ކުރުވާ ފައިސާނުދީ ހުރިކަން ވަރަށް ގިނަ ކުންފުނިތަކުން ކަންބޮޑުވުމާ އެކު ފާހަގަ ކުރެ އެވެ.
އެކަމުގެ ސަބަބުން ކުންފުނިތައް ހުއްޓި އިނދަޖެހިފައިވާ ކަމަށް ބުނެ އެވެ. އެ ފައިސާތައް ލިބޭނެ ގޮތް ވޭތޯ ކުންފުނިތަކާއި ސަރުކާރުގައި އެދޭތާ އެތައް ދުވަހެއް ވެއްޖެ އެވެ.
Advertisement
This content is created and paid for by advertisers and does not involve Voice Journalists
