މަސްވެރިންގެ ދުވަހުގެ މުނާސަބަތުގައި ދިނުމަށް ހަމަޖެހިފައިވާ ކެޔޮޅުންގެ އެވޯޑާއި ޚިދުމަތްތެރި ފަރުމަސްވެރިޔާގެ އެވޯޑަށް ކުރިމަތިލުމުގެ ފުރުޞަތު ހުޅުވާލައިފިއެވެ.

މިކަމާ ގުޅޭގޮތުން މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ބުނީ، މި އަހަރުގެ މަސްވެރިންގެ ދުވަސް ފާހަގަ ކުރުމަށް ބޭއްވުމަށް ހަމަޖެހިފައިވާ ރަސްމިއްޔާތުގައި މަސްވެރިކަމުގެ އެވޯޑްތަކަށް މިހާރު ކުރިމަތިލެވޭނޭކަމަށެވެ.

އެންމެ މޮޅު ކެޔޮޅުގެ އެވޯޑް ދެ އުމުރުފުރައަކަށް ދިނުމަށް ވަނީ ނިންމާފައެވެ. އެއީ 35 އަހަރުން ދަށާއި އެ އުމުރުފުރައިން މައްޗަށެވެ.

މި އެވޯޑްގައި މިހާރުވެސް މަސްވެރިކަމުގައި ޢަމަލީގޮތުން އުޅޭ، އަދި މަސްވެރިކަން ފިޔަވައި، އާމްދަނީ ހޯދުމަށް އެހެން މަސައްކަތެއް ނުކުރާ އެންމެ ޚިދުމަތްތެރި ޒުވާން ކެޔޮޅުގެ އެވޯޑް ދިނުމަށް ވަނީ ހަމަޖެހިފައެވެ. މި އެވޯޑް ދިނުމަށް ހަމަޖެހިފައިވާ އުމުރުފުރައަކީ 35 އަހަރުން ދަށެވެ. 

ފަރުމަހުގެ މަސްވެރިކަން ކުރާ ޚިދުމަތްތެރި ފަރުމަސްވެރިޔާގެ އެވޯޑް ދޭނީ، އާމްދަނީ ހޯދުމަށްކުރާ މައިގަނޑު މަސައްކަތެއްގެ ގޮތުގައި ފަރުމަހުގެ މަސްވެރިކަން ކުރާ ފަރާތަކަށެވެ.

މި ތިން އެވޯޑަށް ކުރިމަތިލުމުގެ އެންމެ ފަހު ތާރީހަކީ މިމަހުގެ 23 ވަނަ ދުވަހެވެ. މިއަހަރުގެ މަސްވެރިންގެ ދުވަސް ބޭއްވުމަށް ހަމަޖެހިފައިވަނީ، ރ. ދުވާފަރުގައެވެ. ދުވާފަރަކީ މަސްވެރި ރަށެކެވެ.