އުސްފަސްގަނޑު ސަރަހައްދުގައި ގާއިމްކުރެވޭ ދާއިމީ ސްކޭޓިން އެރީނާ އަކީ ކުޅިވަރާއި އިޖުތިމާއީ ގޮތުން ގިނަ މަންފާތަކެއް ލިބޭނެ މުހިންމު މަޝްރޫއުއެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.

އިއްޔެ ފެށި މި މަޝްރޫއުއާ ގުޅޭގޮތުން އެކްސްގައި ކުރެެއްވި ޕޯސްޓެއްގައި ރައީސް ވިދާޅުވީ މި އެރީނާއަކީ ޒުވާނުންގެ ކުރިއެރުމާއި މުޖުތަމައުގެ ދުޅަހެޔޮކަމަށް ކުރެވޭ މުހިންމު މަސައްކަތެއް ކަމަށެވެ.

އަދި މި އެރީނާގެ ސަބަބުން ދުނިޔޭގެ ފެންވަރުގައި ކުރިއަރަމުން އަންނަ ސްކޭޓްގެ ކުޅިވަރުން ކުރިއަށްދިޔުމަށް ދިވެހި ޒުވާނުންނަށް ގިނަ ފުރުސަތުތައް ފަހިވެގެންދާނެ ކަމުގައި ވިދާޅުވި އެވެ.

"..މި މަސައްކަތް ފެށިގެންދާ މުނާސަބަތުގައި ރޯލަރސްކޭޓާއި ސްކޭޓްބޯޑު ކޮމިޔުނިޓީއަށް މަރުޙަބާ ދަންނަވަން," ރައީސްގެ ޕޯސްޓްގައި ވިދާޅުވި އެވެ.

ސްކޭޓް އެރީނާގެ ބިންގާ އަޅައިދިނީ ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު އާއި އާރުސީސީގެ ޑެޕިއުޓީ މެނޭޖިން ޑިރެކްޓަރު އާދަމް ރަޙީމް އެވެ.

ކުޅިވަރާއި ހަށިހެޔޮކަމާއި ބެހޭ ވުޒާރާ އިން ބުނީ މިއީ އާރުސީސީގެ ސީއެސްއާރު ޕްރޮޖެކްޓެއް ކަމަށެވެ.

މި އެރީނާގައި ނިމިގެންދާއިރު ސްޕީޑް ސްކޭޓިން ޓްރެކަކާއި ސްކޭޓް ބޯޑް ދުއްވުމަށް ޕާކެއް ވެސް ހިމެނޭނެ އެވެ. އިއްޔެ ހަވީރު އޮތް ރަސްމިއްޔާތުގައި ސްކޭޓްކުރަން ޝައުގުވެރިވާ ވަރަށް ގިނަ ކުދީން ބައިވެރިވެފައިވެ އެވެ.