މިރޭގެ މުޒާހަރާއާ އިލްޔާސް ދެކޮޅު، އަދާލަތު ޕާޓީ މެންބަރުން ނެރެނީ އޮޅުވާލައިގެން
އިދިކޮޅު މައި ޕާޓީ -- އެމްޑީޕީން މިރޭ ސަރުކާރާއި ދެކޮޅަށް ބާއްވާ މުޒާހަރާގައި އަދާލަތު ޕާޓީން ބައިވެރިވާތީ އެކަމާއި އެ ޕާޓީގެ އިލްމުވެރީންގެ މަޖިލީހުގެ ރައީސް ޑރ. އިލްޔާސް ހުސައިން ދެކޮޅު ހައްދަވައިފި އެވެ.
އަދާލަތު ޕާޓީގެ ކޮމިއުނިޓީ ގުރޫޕްގައި އިލްޔާސް ކުރެއްވި މެސެޖެއްގައި ވަނީ މިރޭގެ މުޒާހަރާގައި އަދާލަތު ޕާޓީން ބައިވެރިވާތީ އެކަމާއި ސުވާލުތަކެއް އުފައްދަވާފަ އެވެ. އިލްޔާސް ވަނީ ސަރުކާރު ޒިންމާދާރު ކުރުވުމަށް އަދާލަތު ޕާޓީ ބަސްބުނަން ޖެހެނީ ވަކި ޕާޓީއެއްގެ ފަހަތުގައި ނިވާވެ އޮވެގެންތޯ ސުވާލު ކުރައްވާފަ އެވެ.
އަދި މިކަން އަދާލަތު ޕާޓީގެ މެންބަރުންނަށް ހާމަކޮށްނުދީ އޮޅުވާލައިގެން ކަންކަން ކުރިއަށް ގެންދިއުން ހުއްޓާލަން ނުޖެހޭތޯ ސުވާލު ކުރެއްވި އެވެ. ޝެއިހްގެ އެ މެސެޖަށް ބައެއް މެންބަރުން ވަނީ ތާއީދު ކުރައްވާފަ އެވެ.
މިރޭ އޮންނަ މުޒާހަރާގައި ބައިވެރިވާން އަދާލަތުން ނިންމީ އެ ޕާޓީގެ ރައީސް އިމްރާންގެ ނުފޫޒުގައި އަދާލަތުގެ ރަސްމީ އެއްވެސް ގުނަވަނަކުން ނިންމައިގެން ނޫން ކަމަށް އެ ޕާޓީގެ ބައެއް އިސް ބޭފުޅުން ވަނީ ވިދާޅުވެފަ އެވެ. އެކަމާއި ޕާޓީގެ ތެރޭގައި ހިޔާލުތަފާތުވުން ވަނީ އުފެދިފަ އެވެ.
Advertisement
This content is created and paid for by advertisers and does not involve Voice Journalists
