މިއަދު އެމްޑީޕީއިން ކުރިޔަށް ގެންދާ މުޒާހަރާ އަކީ ގޮތް ހުސްވެގެން ގައުމުގެ އަމާންކަން ނަގާލާ މަގުތައް ހަލަބޮލިކުރުމުގެ ނިޔަތުގައި އަމިއްލަ ސިޔާސީ މަގްސަދެއް ހާސިލްކުރަން ބާއްވާ ހަރަކާތެއް ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ އެމްޑީޕީގެ ސަރުކާރުން އޭރު ކުރަމުންދިޔަ ވައްކަންތަކުގެ ވާހަކަ އެ ބޭފުޅުން ގެން ދިޔައީ ކެނޑިނޭޅި މަޖިލީހުގައި ދައްކަމުން ކަމަށެވެ.ކޮވިޑުގެ ބަލިމަޑުކަންވެސް އެމްޑީޕީއަށް ވީ ވައްކަންކުރަން ލިބުނު ރަނުގެ ފުރުސަތަކަށް ކަމަށާ ވެންޓިލޭޓަރުން ކުރީ ވެސް ވައްކަން ކަމަށެވެ.

"...އެޅި ކޮވިޑް ފެސިލިޓީތަކުން ކުރީ ވައްކަން. ފެސިލިޓީތަކަށް ކޭޓާ ކުރުމުގައި ވެސް ކުރީ ވައްކަން. އެންމެ ކުޑަމިނުން މާސްކުން ވެސް ކުރީ ވައްކަން. މަގު ހެދުމުން ކުރީ ވައްކަން. ހޮސްޕިޓަލްތައް އެޅުމުގެ ނަމުގައި ކުރީ ވައްކަން. ކުނި މެނޭޖްކުރާ ސެންޓަރުތައް ހެދުމުގެ ނަމުގައި ކުރީ ވައްކަން. މިހެންގޮސް ކިޔާނެ ކަމެއް ނެތް، ވައްކަން ނުކުރާ ހަމަ އެއްވެސް ދިމާލެއް އޭރަކު  ނެތް,"

ޝިޔާމް ވިދާޅުވީ ފެނަކައިން އޭރު ކުރަމުން ދިޔަ ވައްކަންތައް ފިއްކަނޑައިގެންދާވަރު ކަމަށެވެ. އަދި މަޖިލީހުން ދެ ފަހަރެއްގެ މަތިން އެ މައްސަލަތައް ބަލަން މަސައްކަތްތަކެއް ކުރެވުނު ކަމަށް ވިދާޅުވި އެވެ. ނަމަވެސް ރައީސް ސޯލިހް ވަނީ އެކަން މަޖިލިސް ތެރެއިން ހުއްޓުވާފައި ކަމަށް ވިދާޅުވި އެވެ. އަދި އޭސީސީގެ މެންބަރުން ބަދަލުކުރިކަން ފާހަގަ ކުރެއްވި އެވެ.

އެމްޑީޕީ ސަރުކާރުގެ ފަސް އަހަރު އެކަނި 64 ބިލިއަން ރުފިޔާގެ ދަރަނި އުފެއްދިއިރު ވެރިކަން ނިންމާލީ މަސްވެެރިންނަށް 250 މިލިއަން ނުދައްކާ ކަމަށާ ކުދި އަދި މެދު ފަންތީގެ ވިޔަފާރިތައް ފުނޑާލާ ދިވެހި ވިޔަފާރިތަކަށް 8 ބިލިޔަން ރުފިޔާ ދައްކަން އޮތް ކަމަށް ވެސް ޝިޔާމް ވިދާޅުވި އެވެ.

"... މިއަދު ޑޮލަރަށް މިއަރާ ބާރަކީ އޭރު އެތައް ބިލިއަނުން ފައިސާ ޗާޕުކުރުމުގެ ނަތީޖާ. ތަކެތީގެ އަގުބޮޑުވެ ދިރިއުޅުމުގެ ހަރަދުތައް ބޮޑުވެ އާއިލާތައް ނިކަމެތިވެ ގައުމުގެ އިޖުތިމާއީ ފޭރާން އެއްކޮށް ވީދާ ކުދިކޮށްލި,"

ޝިޔާމް ވިދާޅުވީ ރައީސް ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު އަތުވީ އިގްތިސާދީ ހުސް ތޮށިގަނޑެކެވެ. އަދި ފައިސާ ޗާޕްނުކޮށް މި ހާލަތުން އަރައިގަނެ ތަރައްގީގެ މަޝްރޫއުތައް ބާރަށް ކުރިޔަށް ދާތަން ބަލަން ތިބުން ވާދަވެރިންނަށް ކެތްވާވަރު ކަމަކަށް ނުވާ ކަމަށެވެ.

"މިއަދު އެމްޑީޕީއިން ކުރިޔަށް ގެންދާ މުޒާހަރާ އަކީ ގޮތް ހުސްވެގެން ގައުމުގެ އަމާންކަން ނަގާލާ މަގުތައް ހަލަބޮލިކުރުމުގެ ނިޔަތުގައި އަމިއްލަ ސިޔާސީ މަގްސަދެއް ހާސިލްކުރަން ބާއްވާ ހަރަކާތެއް," މިރޭގެ މުޒާހަރާއާ ގުޅޭގޮތުން ޝިޔާމް ވިދާޅުވި އެވެ.

ޝިޔާމް ވަނީ ވަނީ މި ސަރުކާރުން ގާނޫނު ތަންފީޒު ކުރުމުގައި ފަހަތަކަށް ނުޖެހޭނެ ކަމަށާ ގައުމުގެ އަމާންކަންނަގާލާ މަގުތައް ހަލަބޮލިކޮށް ރައްޔިތުންގެ ހިތްތަކަށް ބިރުވެރިކަން ވައްދަން ކުޑަވެސް ޖާގައެއް ނުދޭނެ ކަމަށް ވިދާޅުވެފަ އެވެ.