‏މިރޭ މާލޭގައި ކުރިއަށްގެންދިޔަ އެއްވުމާ ގުޅިގެން ދިވެހި ފުލުހުންގެ ޚިދުމަތުން ކުރި މަސައްކަތަށް އާންމު ރައްޔިތުންގެ ފަރާތުން ލިބުނު އެއްބާރުލުމަށް ޝުކުރު އަދާކޮށްފި އެވެ.

އެމްޑީޕީން މިރޭ ވަނީ އެތައް ސަތޭކަ ބަޔަކާއެކު މުޒާހަރާ ކޮށްފަ އެވެ.

ދެތީން ގަޑިއިރަށް ދެމިގެންދިޔަ މުޒާހަރާއަށް ފަހު ފުލުހުން ކުރި ޕޯސްޓެއްގައި ބުނީ މިރޭ މާލޭގައި ކުރިއަށްގެންދިޔަ އެއްވުމާ ގުޅިގެން ދިވެހި ފުލުހުންގެ ޚިދުމަތުން ކުރި މަސައްކަތަށް އާންމު ރައްޔިތުންގެ ފަރާތުން ލިބުނު އެއްބާރުލުމަށް އިހުލާސްތެރިކަމާއެކު ޝުކުރު ދަންނަވާ ކަމަށެވެ.

މިރޭގެ މުޒާހަރާ ފުރަތަމަ ފެށީ އާޓިފިޝަލް ބީޗު ސަރަހައްދުގަ އެވެ. މިރޭގެ މުޒާހަރާއަށް އެތައް ހާސް ބަޔަކު އެއްވި އެވެ. އާޓިފިޝަލް ބީޗް ސަރަހައްދުގައި މުޒާހަރާގެ ބައިވެރީންނާއި އެމްޑީޕީގެ އިސް ބޭފުޅުން ވާހަކަ ދެއްކެވި އެވެ.

އަދި އޭގެ ފަހުން ގޮވާލީ މަގުމައްޗަށް ނިކުތުމަށެވެ. އެހެން ކަމުން މުޒާހަރާގެ ބައިވެރީން ވަނީ މަޖީދީމަގަށް ނިކުމެފަ އެވެ. އޭރު ފުލުހުން ވަނީ ބައެއް ސަރަހައްދުތައް ބަަންދުކޮށްފަ އެވެ. ވަރަށް ގިނަ އަދަދެއްގެ ފުލުހުން ޝީލްޑާއެކު ހަރަކާތްތެރިވަމުން ދިޔަ އެވެ.

މުޒާހަރާގެ ބައިވެރީން ކުރިއަށްދާން ފުުރުސަތު ނުދިނުމުން ހަމަނުޖެހުން އުފެދުނެވެ. ބައެއް މީހުން ވަނީ ބެރިކޭޑްތައް އުކާލާފަ އެވެ.

އަދި ފުލުހުން ގެންގުޅޭ ޝީލްޑްތަކުގައި ތަޅާ ހަދާފައިވެ އެވެ. 

އެއްވުމުގެ ބައިވެރިން ހުއްޓުވަން ފުލުހުން ވަނީ ކަރުނަ ގޭސްވެސް ޖަހާފަ އެވެ. މުޒާހަރާގެ ބައިވެރިން ވަނީ ފުލުހުންނާއި ދިމާއަށް އެކި އެއްޗެހި އުކާފަ އެވެ.

މުޒާހަރާގެ ބައިވެރީން ވަނީ ދެތީން ގަޑިއިރު މަޖީދީމަގުގައި ހަރަކާތްތެރިވެފަ އެވެ. އަދި ޕާޓީގެ ލީޑާޝިޕްގެ ބޭފުޅުން ވަނީ މަގުމަތީ އިށީންދެ ތިބެ އަޑުއުފުލާފަ އެވެ.

އޭގެ ފަހުން އެމްޑީޕީން ވަނީ މުޒާހަރާ ރަސްމީކޮށް ނިންމާލިކަން އިއުލާނުކޮށްފަ އެވެ. އޭގެ ކުރީން ހާއްސަ ދުއާއެއް ކުރުން އޮތެވެ.

އެ ޕާޓީގެ ލީޑާޝިިޕުން ބުނީ މިރޭގެ މުޒާހަރާ އަކީ "ވޯމްއަޕް" އެއް ކަމަށެވެ.