ރާއްޖޭގައި މީގެ ކުރިން މުޒާހަރާތައް ކޮންޓްރޯލްކުރަން ބޭނުންނުކުރާ "އެލް-ރާޑް"، ރޭގެ އެމްޑީޕީގެ މުޒާހަރާގައި ފުލުހުން ބޭނުންކޮށްފިއެވެ.
"އެލް-ރާޑް" ނުވަތަ ލޯންގް ރޭންޖް އެކޯސްޓިކް ޑިވައިސްއަކީ ތަންފީޒީ އިދާރާތަކުން ފޯރު ކޮށްދޭންޖެހޭ މުހިންމު މައުލޫމާތުތައް ދުރު ސަރަހައްދަކަށް ފޯރުކޮށްދިނުމަށްޓަކައި ބޭނުންކުރާ މުވާސަލާތީ ވަސީލަތެކެވެ. އެ ވަސީލަތަކީ ލައުޑްސްޕީކަރުން އަޑު ފޯރާ މިންވަރަށްވުރެ ދުރަށް އަޑު ފޯރާނެކަންޔަގީންކުރެވޭ ފަދަ، ބާރުގަދަ ވަސީލަތެކެވެ.
މި ޑިވައިސްގެ ބޭނުން ހިފައި، ރޭ އިދިކޮޅު އެމްޑީޕީން ބޭއްވި މުޒާހަރާގައި ފުލުހުން ވަނީ ފުރަތަމަ ފަހަރަށް ރާއްޖޭގައި "ހައި ޕިޗް" އޯޑިއޯތަކެއް ބޭނުންކޮށްފައެވެ. އެ އަޑުތަކާއި ގުޅިގެން ވަރަށް ގިނަ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
ރޭގެ އެމްޑީޕީގެ މުޒާހަރާގެ ތެރެއިން -- ވޮއިސް ފޮޓޯ
އެގޮތުން އެ އަޑާއި ގުޅިގެން ރޭ ފުލުހުން ދިން އިންޒާރުތައް އަޑުނީވުމާއި އަދި ކަންފަތުގައި ރިއްސުން ފަދަ ކަންކަން ކުރިމަތިވިކަމަށް ރޭގެ މުޒާހަރާގެ ބައިވެރިން ވަނީ ބުނެފައެވެ.
އެހެން ނަމަވެސް، އެލްރާޑް އަކީ، މީހަކަށް ނުވަތަ ބަޔަކަށް ނުކުޅެދުންތެރި ކޮށްލާވަރުގެ ގެއްލުމެއްދޭ 'ސޮނިކް ވެޕަން' އެއް ނޫންކަން، ތަންފީޒީ އިދާރާތަކުން ޔަގީންކޮށްދީފައިވެއެވެ. އަދި އެއީ އެއްވުން ކޮންޓްރޯލްކުރުމަށްޓަކައި ބޭނުންކުރާ، އިންސާނުންގެ ފުރާނައަށް ގެއްލުންނުވާ ޒާތުގެ "ނޮންލީތަލް" އުކުޅުތަކުގެ ތެރޭގައި ހިމެނޭ، ރައްކާތެރި މުވާސަލާތީ ވަސީލަތެކެވެ.
Advertisement
This content is created and paid for by advertisers and does not involve Voice Journalists
