މި ސަރުކާރުގެ އެންމެ ބޮޑު މަޝްރޫޢު، ރަސްމާލެ ތަރައްގީކުރުމަށް ކޮންސަލްޓެންސީ ދޭނެ ފަރާތެއް ހޯދަން ފިނޭންސް މިނިސްޓްރީން އިއުލާންކޮށްފިއެވެ.
ޕްލޭނިންގެ މަސައްކަތްތައް ވެސްކުރާ އެ މިނިސްޓްރީން އިއްޔެ ކުރި އިއުލާނުގައި ބުނީ، އެ މަޝްރޫއަށް ކޮންސަލްޓެންސީ ހޯދަނީ ކްލައިމެޓް ރިސްކް އެޑެޕްޓިވް އައިލެންޑް ޕްލޭނިން މޮޑެލް އުސޫލުތަކަށް ފެތޭ އަދި ތިމާވެށީގެ ގޮތުން ދެމެހެއްޓެނިވި، އިގްތިސޯދީ ގޮތުން ފުދުންތެރި މާސްޓާ ޕްލޭނެއް އެކުލަވާލުމަށް ކަމަށެވެ.
މި ޕްލޭނުގެ ތެރެއިން ދުރު ރާސްތާގެ ތަރައްގީއަސް މަގުފަހިކޮށްދީ، މޫސުމީ ބަދަލުތަކުގެ ސަބަބުން ކުރިމަތިވެދާނެ ގޮންޖެހުންތަކަށް ޙައްލު ހޯދުމަށް ހިމަނާފައިފެއެވެ.
މި މަސައްކަތަށް ޝަައުގުވެރިވާ ފަރާތްތަކުން މި މަހުގެ 14 ވަނަ ދުވަހުގެ ކުރިން، ޕްރޮޕޯސަލްތައް ހުށަހެޅުމަށް އެ ވުޒާރާއިން ވަނީ އެދިފައެވެ.
މި ސަރުކާރުގެ އެންމެ ބޮޑު މަޝްރޫއުކަމުގައިވާ ރަސްމާލެ ތަރައްގީކުރުމަށް ފުށިދިއްގަރު ފަޅު ހިއްކަން ފަށައިފައިވަނީ 2023 ވަނަ އަހަރުގެ ޑިސެމްބަރު މަހުގެ 18 ވަނަ ދުވަހުއެވެ. އެ މަޝްރޫއު ތަރައްގީކޮށް ނިމޭއިރު، ރާއްޖޭގެ ރަށަކުން އެންމެ ގިނަ ބޯހިޔާވަހިކަން ލިބޭނެ ރަށަށް ނުވަތަ ސިޓީއަށް ރަސްމާލެ ވާނެއެވެ.
އެގޮތުން މުޅި ޖުމްލަ 65،000 ހައުސިން ޔުނިޓު ޤާއިމްކުރާނެއިރު، އެކަން ރައީސް ސިފަކުރައްވައިފައިވަނީ މާލޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނެސްދޭނެ މަޝްްރޫއެއްގެ ގޮތުގައެވެ.
Advertisement
This content is created and paid for by advertisers and does not involve Voice Journalists
