މަޝްހޫރު ވިޔަފާރިވެރިޔާ އަދި މަޖިލީހުގެ މީދޫ ދާއިރާގެ މެންބަރު އަޙްމަދު ސިޔާމް މުޙައްމަދު ހުޅުމާލެއިން ބިމެއް ބައްލަވައިގަނެފިއެވެ.

ހުޅުމާލެ ދެވަނަ ފިޔަވަހީގައި އޮތް 3،252 އަކަ ފޫޓޫގެ އެ ބިން އެޗްޑީސީން ސިޔާމަށް ވިއްކައިފައިވަނީ 31 މިލިއަން ރުފިޔާއަށެވެ.

އެ ބިމަށް ވާ ފައިސާ އެއްކޮށް ދައްކައި ޚަލާސްކޮށްފައިވާތީވެ، އެ ބިމުގެ މިލްކުވެރިކަން ރަސްމީކޮށް ސިޔާމަށް ބަދަލުކުރުމަށް ސިވިލް ކޯޓުން މިދިިޔަ ބުރާސްފަތި ދުވަހު ވަނީ ޙުކުމް ވެސް ކޮށްފައެވެ. އެބިމަކީ ރަހުނުކޮށްފައިވާ ބިމެއް ނޫންކަމަށް ވެސް އެޗްޑީސީން ބުނެފައިވެއެވެ.

ސިޔާމް ނުވަތަ ސަން ސިޔާމް އަކީ ރާއްޖޭގައި އަދި ރާއްޖެއިން ބޭރުގައި ވެސް ފުޅާދާއިރާއެއްގައި ރިސޯޓުތައް ހިންގާ މަޝްހޫރު ވިޔަފާރިވެރިއެކެވެ. އެގޮތުން ރާއްޖޭގައި ސިޔާމްގެ 5 ރިސޯޓެް ހިންގާއިރު، ސްރީލަންކާގައި ވެސް އޭނާގެ ރިސޯޓެއް ހިންގައެވެ.

ސިޔާސީ ދާއިރާގައި ވެސް މަޝްހޫރު ސިޔާމްއަކީ މޯލްޑިވްސް ޑެވެލޮޕްމަންޓް އެލަޔަންސް (އެމްޑީއޭ)ގެ ރައީސަކީ ވެސް ސިޔާމްއެވެ. އެ ޕާޓީއަކީ 2018 ވަނަ އަހަރު ވެރިކަމަށް އައި އެމްޑީޕީގެ އޭރުގެ އިއްތިހާދުގެ ބައިވެރިއެއް ވެސް މެއެވެ. މިހާރު މިހިނގާ 20 ވަނަ ރައްޔިތުންގެ މަޖިލީހުގައި ވެސް ސިޔާމްއާއި އެކު އެމްޑީއޭގެ އިތުރު މެންބަރަކު އިންނަވައެވެ.